Криптовалютын томоохон бирж Binance аравдугаар сарын 29-нд гарсан халдлагын улмаас алдагдсан 6.34 тэрбум ам.долларын хөрөнгийг өөрийн санхүүжилтээр бүрэн нөхөж дууссанаа пүрэв гарагт албан ёсоор мэдээллээ. Энэ нь түүхэнд бүртгэгдсэн хамгийн том крипто хулгайд тооцогдож байгаа бөгөөд уг мэдэгдэл нь хулгайлагдсан койноо буцаан авсан гэсэн үг биш, харин алдагдсан токенуудыг өөрийн нөөц хөрөнгөөр орлуулан байршуулсан гэсэн утгатай юм.

Биржийн мэдээлснээр уг хөрөнгийг зах зээл болон OTC (биржийн бус) сувгаар худалдан авч нөхсөн байна. Үүнд хэрэглэгчдийг хамгаалах SAFU сангийн зарим хэсэг, эрсдэлийн удирдлагын шаардлагаас давсан фьючерсийн даатгалын сангийн эх үүсвэр болон компанийн төв санг ашиглажээ. Түүнчлэн Binance нь SAFU санг эргэн 1 тэрбум ам.долларт хүргэж дүүргэхээ амласан байна.

Нөөцийн баталгаажуулалт ба татан авалт

Binance арваннэгдүгээр сарын 12-ны байдлаар нийт 198 токеныг хамарсан шинэ нөөцийн тайлангийн (proof-of-reserves) агшин зургийг гаргажээ. Халдлагын дараа буюу аравдугаар сарын 31-нд гаргасан тайланд ердөө 10 токен багтаж байсан юм. Хэдий тийм боловч хэрэглэгчид өөрсдийн хөрөнгийг 1:1 харьцаатай баталгаажсан эсэхийг одоогоор шууд шалгах боломжгүй байна. Тооцооллын ачааллаас шалтгаалан zero-knowledge proof баталгаажуулалт хийгдэхэд ойролцоогоор 40-өөс 50 цаг шаардагдана гэдгийг тус бирж дурджээ.

Түүнчлэн харилцагчдын зарлага, татан авалтыг үе шаттайгаар нээж байгаа аж. Арваннэгдүгээр сарын 1-нд эхлээд биткойны татан авалтыг сэргээсэн бол дараа нь бусад сүлжээнүүдийг шат дараатай нээж байна. Халдлага нь аравдугаар сарын 29-нд хуурамч ажлын ярилцлага болон хортой хөгжүүлэгчийн хэрэгслээр дамжин халуун түрийвчнүүдийг (hot wallets) хоосолсноор эхэлсэн талаар биржийн арваннэгдүгээр сарын 3-ны тайланд дурдсан байдаг. Харин одоогийн байдлаар хулгайлагдсан хөрөнгөөс хэр их хэмжээг эргүүлэн олж авсан болон халдагчийн хэн болох талаарх мэдээллийг дурдаагүй байна.