Парис хотод төвтэй, биткойны нөөц бүхий Capital B компани өөрийн хувьцааг 10:1 харьцаагаар нэгтгэх (reverse stock split) шийдвэр гаргаснаа албан ёсоор мэдэгдлээ. Энэхүү өөрчлөлт нь есдүгээр сарын 8-наас хэрэгжиж эхлэх бөгөөд одоогийн 300,650,632 ширхэг хувьцааг 30,065,063 ширхэг болгон бууруулах юм.
Компанийн зүгээс энэ үйлдлийг «зөвхөн техникийн шинжтэй солилцоо» гэж тодорхойлсон бөгөөд хувьцаа эзэмшигчдийн нийт хөрөнгийн үнэлгээнд өөрчлөлт орохгүй гэдгийг онцолжээ. Хувьцааны нэрлэсэн үнэ нь одоогийн €0.08-оос €0.80 болж өсөх юм. Энэхүү алхам нь институцийн хөрөнгө оруулагчдад хаалгаа нээх, хөрөнгийн зах зээлийн шаардлагад нийцүүлэх зорилготой ажээ. Олон институцийн сангууд тодорхой үнээс доош үнэтэй хувьцааг эзэмшихийг хориглосон дотоод дүрэмтэй байдаг тул хувьцааны үнийг өсгөх нь тэдгээр хөрөнгө оруулагчдыг татахад тус дөхөм болно гэж үзэж байна.
Хувьцаа эзэмшигчдэд анхаарах зүйлс
Хувьцааг нэгтгэх үйл явц наймдугаар сарын 6-наас есдүгээр сарын 7-ны хооронд үргэлжилнэ. 10-т хуваагдах тооны хувьцаа эзэмшигчид ямар нэгэн үйлдэл хийх шаардлагагүй бөгөөд автоматаар хөрвөх юм. Харин үлдэгдэл хувьцаатай хөрөнгө оруулагчид есдүгээр сарын 7-ноос өмнө хувьцаагаа худалдан авах эсвэл зарах замаар 10-ын үржвэр болгох боломжтой.
Есдүгээр сарын 7 нь хуучин хувьцаагаар арилжаа хийх сүүлийн өдөр бөгөөд есдүгээр сарын 8-наас нэгтгэсэн хувьцаанууд шинэ кодтойгоор арилжаалагдаж эхэлнэ. Capital B компани нь Европ дахь биткойны нөөцтэй хоёр дахь том бүртгэлтэй компани бөгөөд одоогоор 3,139 BTC эзэмшиж байна.
