Сейшелийн Викториад төвтэй крипто бирж Bitget өнгөрсөн долоо хоногт халдлагад өртөж, 388 сая ам.долларын крипто валютаа алдсан билээ. Тус бирж хэрэглэгчдийн зарлагын гүйлгээг дахин нээсний дараахан эхний нэг цагийн дотор 4,000 гаруй биткойн буюу өнөөгийн ханшаар 334 сая гаруй ам.долларын хөрөнгийг хэрэглэгчид татан авсан тухай тус компанийн гүйцэтгэх захирал Грэйси Чен (Gracy Chen) мэдэгдлээ.
Гүйцэтгэх захирал Грэйси Чен Мягмар гарагт Bloomberg Television-д өгсөн ярилцлагадаа, их хэмжээний татан авалтын дараагаар биржийн зарлагын гүйлгээ тогтворжсон гэдгийг дурджээ. Тэрээр Даваа гарагт X хуудсаараа дамжуулан 4,098 биткойн бүхий 9,585 ширхэг гүйлгээний захиалга амжилттай хийгдсэнийг мэдээлсэн юм. Одоогоор тус бирж хэрэглэгчдэдээ хөрөнгөө үе шаттайгаар татах боломж олгож байна.
Халдлагын нөхцөл байдал ба хамгаалалтын сан
Блокчэйн шинжээчид биржээс хөрөнгө гадагшилж байгааг анхааруулсны дараа Bitget зарлагын гүйлгээгээ түр хугацаанд царцаасан байсан юм. Халдагчид биржийн халуун түрийвчийг (hot wallets) онилсон бөгөөд гуравдагч талын бүтээгдэхүүний эмзэг байдлыг ашиглан дотоод итгэмжлэх мэдээллийг хулгайлж, улмаар эрсдэлийн хяналтын системийг тойрон хуурамч татан авалт хийсэн гэж Грэйси Чен тайлбарлав. Харин хүйтэн түрийвчинд (cold storage) байршиж байсан хөрөнгөд халдаагүй гэдгийг тэрээр онцолсон байна.
Bitget-ийн мэдээлснээр халдлагын арга барил нь Хойд Солонгосын хакерын бүлэглэлүүдийн үйл ажиллагааны хэв маягтай тун төстэй байжээ. Мөн энэ нь тус биржийн сүүлийн найман жилийн хугацаанд гарсан анхны ийм төрлийн аюулгүй байдлын зөрчил болсон аж.
Bloomberg-ийн тайлагнаснаар тус биржийн хамгаалалтын сан халдлагаас өмнө 464 сая ам.доллар байсан бол үүний дараа 200 сая доллароос доош орж буурсан бөгөөд компани өөрийн хөрөнгөөр уг сангаа эргүүлэн зузаатгаж байгаа ажээ. CoinGecko-ийн мэдээллээр арилжааны хэмжээгээрээ дэлхийд зургаадугаарт ордог, сүүлийн 24 цагт 811 сая долларын гүйлгээ хийсэн тус биржийн хэрэглэгчид ихэвчлэн Ази тивд байрладаг байна. Компанийн зүгээс халдлагыг бүрэн хязгаарласан бөгөөд зөвшөөрөлгүй шилжүүлэг дахин гарах боломжгүй болсон гэж мэдэгджээ.
