Найруулагч Ridley Scott-ын 1982 онд бүтээсэн шинжлэх ухааны уран зөгнөлт киноны ертөнц үргэлжлэх нь тодорхой боллоо. Тэрээр 2017 онд гарсан Blade Runner 2049 киноны дараах үйл явдлыг өгүүлэх цуврал төслөө зарласнаас хойш таван жилийн дараа Prime Video стриминг үйлчилгээ Blade Runner 2099 цувралын анхны танилцуулгыг Сан Диегогийн Comic-Con наадмын үеэр олон нийтэд дэлгэв.
Арван ангиас бүрдэх энэхүү шинэ цувралын талаарх мэдээллийг шоуны ерөнхий продюсер Silka Luisa танилцуулсан бөгөөд гол дүрийн жүжигчид болох Yeoh болон Schafer нар тайзан дээр гарч үзэгчидтэй мэндчилжээ. Шоуны ерөнхий продюсерын хэлснээр, тус цуврал нь анхны киноны “нуар” буюу харанхуй, нууцлаг хэв маягийг хадгалан үлдэх бөгөөд түүхийн эх сурвалж болон ирээдүйг холбосон томоохон нууцыг агуулсан байна.
Цувралын албан ёсны товч агуулгад дурдсанаар, уг ертөнцөд бослого гарч, хүн төрөлхтөн ялагдал хүлээснээр тэд хоёрдугаар зэргийн иргэн буюу ангуучлагдах ёстой амьтад болон хувирчээ. Silka Luisa энэ талаар "Бидний дараа юу ирэхийг, мөн хүн төрөлхтөн өөрийн ач холбогдлоо алдсан ертөнцөд хүн байх гэдэг нь юу гэсэн үг болохыг энэ цуврал харуулахыг зорьж байна" хэмээн онцолсон байна.
Comic-Con наадмын үеэр мөн Prime Video-гийн Rings of Power цувралын гуравдугаар улирал болон HBO-гийн Lanterns цувралын шинэ трэйлэрүүд үзэгчдийн хүртээл болсон юм.
