Их Британийн инди-поп урсгалаар уран бүтээл туурвидаг Blossoms хамтлаг өөрсдийн нэрээр нэрлэсэн анхны цомгийнхоо 10 жилийн ойг тохиолдуулан Манчестер хотын «Deaf Institute»-д онцгой тоглолтоо хийлээ. Тус хамтлагийн гоцлол дуучин Том Огден NME сэтгүүлд өгсөн ярилцлагадаа өнгөрсөн 10 жилийн хугацаанд туулсан замнал болон удахгүй гарах ‘Songs From The Wedding Cake’ нэртэй зургаа дахь цомгийнхоо талаар хуваалцсан байна.
Хамтлагийнхан 2014 оноос хойш анх удаа тоглож буй энэхүү жижиг танхимдаа анхны цомгоо бүхэлд нь дуулж, шүтэн бишрэгчидтэйгээ уулзжээ. Тоглолтын үеэр тэд хуучны хит дуунуудаасаа гадна шинэ цомогт багтах бүтээлүүдээсээ сонирхуулсан байна. Энэхүү тоглолтыг ‘Live At The Deaf Institute’ нэртэйгээр амьд хөгжмийн цомог болгон бичиж авчээ.
Том Огден ярилцлагадаа хамтлагийн өсөлт дэвшил болон шүтэн бишрэгчидтэйгээ харилцах харилцааны талаар онцолсон байна. Тэрээр: «Бид амжилтад хүрсэн ч гэсэн хэзээ ч зөвхөн ололт амжилтаараа бахархаад суухыг хүсээгүй. Ийм жижиг, дотно орчинд тоглох нь бидэнд маш үнэ цэнтэй байдаг» хэмээн ярьжээ. Тоглолтын үеэр Declan McKenna тайзан дээр гарч ирэн хамтлагтай хамтарсан шинэ дуугаа дуулсан нь үзэгчдийн хувьд гэнэтийн бэлэг болсон байна.
Blossoms хамтлаг зургаадугаар сард шинэ цомгийнхоо нээлтийг Манчестер хотын 42nd Street шөнийн клубийн гадаа фургон машин дээр тоглолт хийж эхлүүлж байсан билээ. Тэдний шинэ уран бүтээлүүд болон ирээдүйн төлөвлөгөө нь шүтэн бишрэгчдийнх нь дунд хүлээлт үүсгээд байна.
