Америкийн алдарт дуучин, хөгжмийн зохиолч, бүжигчин Бруно Марс Лас Вегас хотноо “The Romantic Tour” нэртэй аялан тоглолтоо эхлүүлж, тус хотын хүндэт иргэн болж, “Бруно Марсын өдөр”-ийг тэмдэглэн өнгөрүүллөө. Лас Вегасын удирдлагууд түүний хөгжмийн урлагт оруулсан хувь нэмрийг үнэлж, хотын бэлгэ тэмдэг болох түлхүүрийг гардуулсан байна.
Бруно Марс энэ үеэр хүүхдийн эрүүл мэндийг дэмжих зорилгоор Intermountain Health Nevada Children’s Hospital-д нэг сая доллар хандивлахаа мэдэгдсэн нь олны талархлыг хүлээсэн юм. Тэрээр өөрийн тоглолтын үеэр цуглуулсан орлогын тодорхой хэсгийг энэхүү хандивт зориулсан байна.
Бруно Марс нь “Uptown Funk”, “24K Magic”, “Just the Way You Are” зэрэг олон хит дуугаараа дэлхий дахинд танигдсан, Грэммийн олон шагналт, авьяаслаг уран бүтээлч билээ. Түүний тоглолт бүр өндөр хэмжээний үзвэртэй болдог бөгөөд фэнүүд нь түүнийг тайзан дээрх гайхалтай үзүүлбэр, хөгжим, бүжгийн хослолоор нь үнэлдэг.
“The Romantic Tour” аялан тоглолт нь Бруно Марсын шинэхэн хит дуунууд болон түүний урын сангаас бүрдсэн дуунуудыг багтаасан бөгөөд Лас Вегасаас эхлэн дэлхийн олон хотыг хамарч үргэлжлэх юм.
