Анимэ сонирхогчдын дунд хэдийнээ танил болсон, уран гулгалтын сэдэвтэй "Yuri!!! on Ice" цуврал 10 жилийн ойгоо угтаж байна. Crunchyroll стриминг үйлчилгээ уг ойн баярыг тохиолдуулан нийт 12 ангиас бүрдэх цувралыг YouTube платформ дээрээ үнэгүй байршуулжээ.
Энэхүү цуврал нь дөрвөн цаг 41 минутын урттай нэгдсэн видео хэлбэрээр байршсан бөгөөд үзэгчид бүх ангийг завсарлагагүйгээр үзэх боломжтой юм. Уг контент нь наймдугаар сарын 25-ныг хүртэл YouTube дээр нээлттэй байх аж.
2016 онд анх нээлтээ хийсэн уг анимэ нь Японы уран гулгагч Юри Кацүки болон Оросын дасгалжуулагч Виктор Никифоров нарын харилцаанд төвлөрдөг. Тухайн үедээ энэхүү бүтээл нь зөвхөн спортын анимэ төдийгүй LGBTQ+ төлөөллийн хувьд ч чухал ач холбогдолтойд тооцогдож, үзэгчдийн дунд өргөн хүрээний хэлэлцүүлэг, фэн урлаг, анализ өрнүүлж байсан юм. "History Maker" нэртэй нээлтийн дуу нь ч мөн олон нийтийн дунд алдаршсан билээ.
Хэдийгээр 2017 онд зарлагдаж байсан бүрэн хэмжээний киноны төслийг MAPPA студи 2024 онд албан ёсоор цуцалсан нь шүтэн бишрэгчдийн хувьд харамсалтай үйл явдал болсон ч, одоогийн энэхүү YouTube-ийн нээлттэй цуврал нь хуучин шүтэн бишрэгчдэд дурсамжаа сэргээх, шинэ үзэгчдэд уг бүтээлтэй танилцах боломжийг олгож байна. Crunchyroll нь энэ удаагийн алхмаараа дамжуулан уг цувралыг үзэхэд ямар нэгэн захиалга шаардлагагүй болгож, хүртээмжийг нэмэгдүүлж байгаа юм.
