Solana (SOL) сүлжээний сан хөмрөгийг бүрдүүлэгч DeFi Development Corp. компани зах зээлийн нөхцөлөөр (at-the-market буюу ATM) 30 сая хүртэлх ширхэг CHAD давуу эрхийн хувьцаа гаргах боломж бүхий шинэ санхүүжилтийн сувгаа нээлээ. Энэхүү хөтөлбөр нь компанийн зүгээс заавал хэрэгжүүлэх үүрэг хүлээгээгүй, сонголт бүхий санхүүжилтийн суваг бөгөөд татан төвлөрүүлсэн хөрөнгийг SOL нэмж худалдан авах болон бусад корпорацын зорилгоор ашиглах боломжтой аж.
Санхүүжилтийн бүтэц ба нөхцөл
CHAD нь хэлбэлзэх хүүтэй, хугацаагүй давуу эрхийн хувьцаа юм. Уг хувьцааны нэрлэсэн суурь үнийг 10 ам.доллар гэж тооцож байгаа бөгөөд нийт 30 сая ширхэг хувьцааны дээд хязгаараар үржүүлбэл 300 сая ам.долларын нэрлэсэн дүн гарч байна. Гэхдээ зах зээл дээрх худалдах бодит үнэ үүнээс өөр байж болох бөгөөд олох бэлэн мөнгөний хэмжээ нь хувьцааг хэчнээн ширхэг гаргах болон тухайн үеийн зах зээлийн үнээс бүрэн шалтгаална.
Компанийн 9 дүгээр сарын 11-нд танилцуулсан танилцуулгад дурдсанаар, борлуулах хамгийн бага босго дүн гэж заагаагүй бөгөөд бүх хувьцаа зарагдана гэсэн ямар ч баталгаа байхгүй юм. DeFi Development нь хувьцааг заавал гаргах үүрэг хүлээгээгүй бол борлуулагч агент R.F. Lafferty ч тодорхой тоо ширхэг эсвэл мөнгөн дүнгээр зарах үүрэггүй. Агент нь нийт орлогын 0.75% хүртэлх шимтгэл авч болно.
Ногдол ашиг ба SOL-ийн нөөц
CHAD хувьцааны байнгын зардалд хуримтлагдах ногдол ашиг багтаж байна. Эхний ээлжид 10 ам.долларын суурь дүнгээс жилийн 13 хувийн ногдол ашиг (нэгж хувьцаанд жилд 1.30 ам.доллар) тооцогдоно. Төлбөрийг Төлөөлөн удирдах зөвлөл шийдвэрлэж, хуулийн дагуу боломжит хөрөнгө байгаа тохиолдолд олгох юм. ТУЗ нь ногдол ашгийн жилийн хувь хэмжээг сар бүр тодорхойлох бөгөөд сарын бууралтын хэмжээ 50 суурь нэгжээр хязгаарлагдах нөхцөлтэй.
Хэрэв 30 сая хувьцаа бүгд жилийн турш эргэлтэд байж, анхны 13%-ийн хувь хэмжээ өөрчлөгдөхгүй хадгалагдвал жилд 39 сая ам.долларын ногдол ашиг хуримтлагдах тооцоо гарна. Гэхдээ бодит хуримтлал нь борлуулалтын тоо хэмжээ, хугацаа болон хүүгийн дараа дараагийн шийдвэрээс хамаарч өөр байх юм.
DeFi Development цэвэр орлогын тодорхой хэсгээр SOL худалдаж авна гэж мэдэгдсэн ч эргэлтийн хөрөнгө болон стратегийн санаачилгад мөн ашиглах боломжтой тул тодорхой хуваарилалт тогтоогоогүй байна. 9 дүгээр сарын 11-ний байдлаар тус компани 2,388,923 ширхэг SOL болон түүнтэй адилтгах хөрөнгийг эзэмшиж байгаа нь 8 дугаар сарын 27-ноос 55,491-ээр өссөн үзүүлэлт юм. Энэхүү өсөлтөд шинэ ATM хөтөлбөрийн орлого ороогүй гэдгийг дурджээ.
