АНУ-ын Нэшвилл хотод байрлах Edgehill рок хамтлаг Billboard-ын Alternative Airplay чартад дахин нэгэн амжилтыг үзүүлэхээр чармайж байна. Крис Келли, Жейк Зиммерман, Эйдан Каннингем нараас бүрдсэн тус хамтлаг өмнө нь "Doubletake" дуугаараа уг чартыг тэргүүлж байсан туршлагатай.
Тус хамтлагийн гоцлол дуучин Крис Келлигийн хэлснээр, тэдний уран бүтээлийн гараа коллежийн үдэшлэгүүд болон оюутны хотхоны арга хэмжээнүүдээс эхэлжээ. Анх өсвөр насныхан болон 20 орчим насны залуучуудын дунд нэр хүндтэй байсан бол одоо тэдний тоглолтыг сонирхох сонсогчдын хүрээ өргөжиж, ахмад үеийнхэн ч нэмэгдэх болсон байна. Келли энэ талаар "Манай тоглолт дээр буурал үстэй хүмүүс харагдах болсон нь радио сонсдог сонсогчид маань нэмэгдэж байгаагийн шинж" хэмээн ярьжээ.
Хамтлагийн гишүүн бүр хөгжмийн өөр өөр суурьтай. Келлигийн хувьд хөгжмийн багш ээж, дуучин аавынхаа нөлөөгөөр багаасаа л хөгжимтэй ойр өссөн бол, хамтлагийн бүрэлдэхүүн Нэшвилл хотод Вандербильтийн их сургуульд суралцах явцдаа бүрэлдэн тогтжээ. Тэд 2022 онд анхны синглээ гаргаснаас хойш сошиал медиагаар дамжуулан алдартай дуунуудын кавер хувилбаруудыг хүргэж, өөрсдийн сонсогчдын баазыг амжилттай бүрдүүлсэн юм.
Одоогоор хамтлаг анхны бие даасан аялан тоглолтоо хийхээр бэлтгэл ажилдаа ороод байна. Тэдний "Doubletake" дууны дараах "Love to Go" дуу нь Billboard-ын чартад идэвхтэй өгсөж байгаа бөгөөд хамтлаг энэ удаад ч мөн адил өндөр амжилт үзүүлэхээр зорин ажиллаж байна.
