CryptoSlate-ийн мэдээлснээр, долдугаар сард Ethereum криптовалютын зах зээл дээрх хөрөнгө оруулалтын бүтээгдэхүүний эрэлт болон байгууллагуудын худалдан авалтаар Биткойныг ардаа орхижээ. Энэ хугацаанд Ethereum-ийн үнэ 19 хувиар өсөж, 1,970 ам.долларт хүрсэн бол Биткойн 8 хувиар өссөн ч 65,000 ам.долларын босгыг давахад хүндрэлтэй байв.
Хөрөнгө оруулалтын урсгалын ялгаа
АНУ-ын спот Ethereum ETF-үүд долдугаар сард 365.17 сая ам.долларын цэвэр мөнгөн урсгалыг бүртгэсэн нь энэ оны хамгийн өндөр үзүүлэлт боллоо. Үүнтэй харьцуулахад Биткойны ETF-үүд ердөө 172.43 сая ам.долларын хөрөнгө татсан нь 2024 оны нэгдүгээр сард арилжаанд гарснаас хойших хамгийн сул үзүүлэлт болсон байна. Энэхүү өсөлтөд Morgan Stanley-ийн шинээр гаргасан Ethereum Trust (MSSE) тодорхой хэмжээгээр нөлөөлсөн бөгөөд тус сан арилжааны эхний өдрүүдэд 20 сая ам.долларын хөрөнгө хуримтлуулжээ.
Байгууллагын түвшинд ч ялгаатай дүр зураг ажиглагдаж байна. Ether-ийн хамгийн том эзэмшигч болох BitMine компани долдугаар сарын турш худалдан авалтаа үргэлжлүүлж, эзэмшлийн хэмжээгээ 5.70 саяас 5.79 сая ETH болгон нэмэгдүүлсэн бол Биткойны хамгийн том эзэмшигч Strategy компани энэ сард ямар ч худалдан авалт хийгээгүй байна.
Зах зээлийн төлөв
Хэдийгээр Ethereum-ийн гүйцэтгэл сайжирч байгаа ч шинжээчид болгоомжтой хандахыг зөвлөж байна. On-chain буюу блокчэйн сүлжээний мэдээллүүдээс харахад, зах зээлийн эргэлтийн үеийг илтгэдэг түүхэн дохионууд хараахан биелээгүй байна. ETH/BTC харьцаа 0.030-аас давсан ч одоогийн байдлаар 0.02962 орчимд тогтворжиж байгаа нь энэ оны эхэн үеийн үзүүлэлтээс 13 хувиар доогуур, 2017 оны дээд амжилтаас 73 хувиар бага хэвээр байна. Иймд шинжээчид зах зээлийн жинхэнэ ёроол хараахан ирээгүй гэж дүгнэж байна.
