Дэлхий даяар сая сая тоглогчтой Fortnite тоглоомд алдарт The Simpsons хүүхэлдэйн киноны ертөнц дахин нэвтрэхээр боллоо. Өнөөдөр буюу долдугаар сарын 30-нд эхлэх шинэ улирлын хүрээнд хөгжүүлэгч Epic Games компани Симпсоны гэр бүлийн дүрүүдээс гадна Жон Уик киноны дүрүүдийг нэмж байгаагаа албан ёсоор мэдэгдэв.
Тоглогчид шинэчлэгдсэн Спрингфилд газрын зураг дээр 50 хүртэлх тоглогчтойгоор тоглох боломжтой бөгөөд энэ нь наймдугаар сарын 3 хүртэл үргэлжлэх юм. Түүнчлэн Жон Уик киноны зочид буудлаас санаа авсан "The Confidential" хэсэг нэмэгджээ. Тус хэсэгт тоглогчид өөрийн гэсэн эрүүл мэндийг нөхөх боломжтой бөгөөд бусад тоглогчидтой дуут чатаар харилцах боломжтой.
Гэвч энэхүү зочид буудлын дотор хүчирхийлэл үйлдэхийг хориглосон байна. Хэрэв тоглогч бусад руу гал нээвэл "excommunicado" буюу хөөгдсөн статустай болж, улмаар бусад тоглогчдын гол бай болно. Хариуд нь тухайн тоглогч хязгааргүй сум болон тэсвэр тэвчээртэй болох ч, өөрийн ховор эд зүйлсээ алдах эрсдэлтэй тулгарна. Мөн Симпсоны хэв маягт оруулсан Жон Уик дүр тоглоомын шагнал дунд багтсан байна.
Энэхүү шинэчлэлтээр Ranked горим, газрын зураг эзэмших шинэ даалгаврууд болон "Reload Portable Extractor" нэртэй шинэ хэрэгсэл нэмэгдэж байна. Энэхүү хэрэгслийг ашиглан ойр орчмын дайснуудаа илрүүлэх боломжтой юм. The Simpsons-ийн продюсер Мэтт Селман энэхүү хамтын ажиллагааг тус хүүхэлдэйн киног олон нийтэд дахин сануулах нэгэн боломж хэмээн онцолжээ.
