Google компани өөрсдийн шинэ Gemini 4 Argon хиймэл оюун ухааны загвар Minecraft тоглоомыг хүний ямар ч тусламжгүйгээр бүрэн дуусгасан гэж мэдэгдлээ. Google DeepMind-ийн судлаачдын 10-р сарын 15-нд нийтэлсэн судалгааны өгүүлэлд дурдсанаар, уг загварын дөрвөн агент хамтран тоглоомын эцсийн босс болох Ender Dragon-ийг буулган авчээ.
Эдгээр хиймэл оюун ухаант агентууд Easy түвшний цоо шинэ Survival ертөнцөд лууг устгах ганцхан даалгавартай эхэлсэн байна. Тэд энэ даалгаврыг биелүүлэхэд нийт 27 цаг 14 минут зарцуулсан бөгөөд тоглолтын явцад ихэвчлэн мангасуудад баригдан 605 удаа үхжээ. Судлаачид тоглолтын явцыг шууд самбараар хянаж, шаардлагатай бол хэзээ ч хөндлөнгөөс оролцох боломжтой байсан ч ямар ч оролцоо хийх шаардлага гараагүй гэжээ. Энэ нь хиймэл оюун ухаан зөвхөн стандарт хэрэгслүүд ашиглан Minecraft-ийг эхнээс нь дуустал бие даан тоглосон анхны тохиолдол гэж тэд онцолсон байна.
Хиймэл оюун ухааны давуу тал ба хязгаарлалт
Гэхдээ Google энэхүү туршилтын хязгаарлагдмал талуудыг нээлттэй хуваалцсан юм. Тоглоомыг Easy түвшинд тохируулсан тул мангасуудын учруулах хохирол бага байжээ. Мөн агентууд тоглоомыг дэлгэцээр бус кодоор дамжуулан тоглосон тул хүний харж чадахгүй мэдээллийг, тухайлбал бусад блокуудын ард юу нуугдаж байгааг урьдчилан харж байсан нь уурхай малтах үйлдлийг хялбарчилсан байна. Түүнчлэн уг загвар сургалтын баазаасаа тоглоомын оновчтой стратегийг мэдэж байжээ.
Хэдийгээр энэ нь томоохон амжилт боловч хүний ур чадварт хараахан хүрэхгүй байгааг судлаачид тэмдэглэв. Тухайлбал, санамсаргүй ертөнцөд уг тоглоомыг дуусгах хүний дээд амжилт долоон минутаас бага байдаг аж.
Яагаад Minecraft-аар туршив?
Судлаачдын тайлбарлаж буйгаар багаар ажиллах, алдаанаасаа суралцах, нэг зорилгын төлөө бүтэн өдрөөс ч илүү хугацаанд тууштай ажиллах зэрэг чадварууд нь хиймэл оюун ухаанд бодит амьдрал дээр ч шаардлагатай байдаг гэнэ. Google-ийн мэдээлснээр уг туршилтын моделийн ашиглалтын зардал Argon-ийн анхны API үнээр тооцоход ойролцоогоор $520 болжээ.
Томоохон хиймэл оюун ухааны загваруудыг видео тоглоомоор турших нь салбарын нийтлэг шалгуур болоод байгаа бөгөөд сүүлийн үед Pokémon төдийгүй Minecraft-аар сорих нь түгээмэл болж байна. Тухайлбал, Anthropic-ийн Claude Opus 5-ыг оролцуулаад олон нийтийн хоёр төсөл өмнө нь хиймэл оюун ухаанаар лууг ялсан тухай мэдээлж байжээ.
