АНУ-ын алдарт поп-панк хамтлаг Green Day-ийн ахлагч Билли Жо Армстронг Сан Диего хотод болсон Comic-Con арга хэмжээний үеэр шүтэн бишрэгчдээ гайхшруулсан гэнэтийн тоглолтыг зохион байгууллаа. Тэрээр 7-р сарын 24-ний өдөр Petco Park цэнгэлдэх хүрээлэнгийн гадна байрлах Gallagher талбайд "Mister Freezie's" нэртэй зайрмагны машины дээвэр дээр гарч, өөрсдийн алдарт "Basket Case" дууг акустик гитараар дуулсан байна.
Энэхүү арга хэмжээ нь Green Day хамтлагийн оролцсон "Nimrods" нэртэй шинэ киног сурталчлах зорилготой байжээ. Тоглолтын дараа түүнтэй хамтлагийн гишүүд болох бөмбөрчин Трээ Күүл болон басс гитарчин Майк Дирнт нар нэгдэж, киноны нэр бүхий зайрмагны машинаас цугларсан олон мянган хүмүүст футболк, кассет болон зайрмаг тараасан байна.
Киноны уран бүтээлчдээс жүжигчин Женна Фишер, Мэйсон Тэймс болон найруулагч Ли Кирк нар энэхүү арга хэмжээнд оролцжээ. "Nimrods" кино нь Green Day хамтлагийн тоглолтод оролцох гэж буйгаа андуурч, Канзас хотоос Лос-Анжелес хүртэл аялалд гарч буй өсвөр насны гурван хүүхдийн тухай өгүүлдэг. Киноны гол дүрд Мэйсон Тэймс, Килр Коффман, Райан Фоуст нар тоглосон бөгөөд Анжела Кинси, Маккенна Грэйс, Фред Армисен, Бобби Ли, Шон Ганн зэрэг олон алдартан дүр бүтээжээ.
Green Day хамтлагийн хамтран продюсерлосон энэхүү кино нь 8-р сарын 14-нд АНУ-д нээлтээ хийхээр төлөвлөгдөж байна. Киноны дууны цомог 7-р сарын 31-нд гарах бөгөөд үүнд Green Day-ийн 22 сонгодог дуу, шинэ дуу болох "I’m Never Gonna R.I.P", амьд тоглолтын бичлэгүүд болон бусад уран бүтээлчдийн дуунууд багтжээ.
