Панк рокын ертөнцийн томоохон төлөөлөгч, Green Day хамтлагийн гоцлол дуучин Билли Жо Армстронг хөгжмийн зэмсгийн зах зээлд шинэ бүтээгдэхүүнүүдээ танилцууллаа. Тэрээр Epiphone брэндтэй хамтран Radiant Red өнгийн Les Paul Junior загварын гитарыг бүтээсэн байна.
Энэхүү гитар нь Армстронгийн сүүлийн хорин жилийн турш ашиглаж ирсэн, хөгжмийн хэв маягийг нь тодорхойлогч загвар дээр суурилжээ. Хязгаарлагдмал тоогоор худалдаанд гарах энэхүү зэмсэг нь нэг ширхэг P-90 PRO пикап, дууны түвшин болон өнгө тохируулах хоёр товчлууртай, энгийн бөгөөд чанартай бүтээгдэхүүн юм. Гитарын толгойн ард дуучны гарын үсэг байрлах бөгөөд иж бүрдэлд нь ирвэсийн арьсан хээтэй доторлогоо бүхий хар өнгийн хайрцаг дагалдах аж.
Үүний зэрэгцээ тэрээр Marshall компанитай хамтран өөрийн анхны нэрэмжит өсгөгчийг (amplifier) бүтээлээ. 1959BJA Artist Signature нэртэй энэхүү төхөөрөмж нь Marshall-ын сүүлийн 14 жилийн хугацаанд гаргаж буй анхны артист загвар юм. Цэнхэр өнгөтэй энэхүү өсгөгч нь 1994 онд гарсан хамтлагийн алдарт цомог болох «Dookie»-ийн үеийн дуугаралтыг санагдуулах «Dookie Mod»-оор тоноглогдсон байна.
Билли Жо Армстронг энэ талаар "Миний нэрэмжит Marshall өсгөгчтэй болсондоо маш их баяртай байна. Эдгээр өсгөгч нь миний шүтээнүүдээс эхлээд өнөөдрийг хүртэл миний хөгжмийн амьдралын салшгүй хэсэг байсаар ирсэн" хэмээн сэтгэгдлээ хуваалцжээ.
