Тусгай хувцас, өвөрмөц дүрээрээ алдаршсан хүнд металл урсгалын GWAR хамтлагийн үүсгэн байгуулагчдын нэг Чак Варга хорт хавдрын улмаас 68 насандаа таалал төгсжээ. Түүний нас барсныг GWAR хамтлагийн басс гитарчин Кэйси Орр есдүгээр сарын 25-ны Баасан гарагт нийгмийн сүлжээгээр дамжуулан зарласан байна. Варга эхнэр Бэмбигийнхээ дэргэд амар тайван нойрссон болохыг Орр онцолжээ.
1958 онд төрсөн Чак Варга нь Виржиниа Хамтын Нөхөрлөлийн Их Сургуульд суралцаж байсан бөгөөд Ричмонд хотод Slave Pit Studios-ийг хамтран байгуулж, улмаар GWAR хамтлаг болж өргөжсөн уран бүтээлийн төслийг хөгжүүлэхэд голлох үүрэг гүйцэтгэсэн юм. Олон талт уран бүтээлч тэрээр 1985 оноос эхлэн хамтлагийн Sexecutioner дүрийг бүтээж, тайзнаа амилуулснаараа хамгийн их танигджээ. Мөн хамтлагийн хувцас, тайз засалт, тулгуур хэрэгсэл, комик зургуудыг бүтээхэд томоохон хувь нэмэр оруулсан байдаг.
Варга 1997 онд хамтлагаасаа гарсан хэдий ч хааяа нэг үзүүлбэрт нь оролцсоор байгаад 2021 онд тайзны уран бүтээлээс бүрмөсөн зодог тайлсан тухай хамтлагийн цахим хуудсанд тэмдэглэжээ.
Өнгөрсөн зургаадугаар сард GWAR хамтлаг түүний хорт хавдрын эмчилгээ, хөнгөвчлөх тусламж, тусгай эмнэлгийн тоног төхөөрөмж болон асаргааны зардалд туслах зорилгоор хандивын аян өрнүүлсэн юм. Энэхүү аянд хандив өргөсөн хүмүүст тус аянд зориулан тусгайлан гаргасан бүтээгдэхүүнүүд, тухайлбал Варгагийн өөрийнх нь зохион бүтээсэн шинэ подволкийг авах эрх олгож байжээ.
