Өнөө үед цахим орчин дахь луйвар, залилангийн гэмт хэрэг улам бүр газар авч байгаа билээ. Саяхан Fast Company-д нийтлэгдсэн мэдээллээр iPhone хэрэглэгчдийг онилсон шинэ төрлийн фишинг халдлага идэвхжиж байгааг анхааруулж байна.
Халдагчид таны iCloud-ын багтаамж дүүрсэн гэх хуурамч сануулга илгээж, таныг хувийн мэдээллээ өгөхөд хүргэх зорилготой аж. Энэ төрлийн халдлага нь “нийгмийн инженерчлэл” гэгддэг арга барилыг ашигладаг бөгөөд энэ нь таны итгэлийг олж, хууран мэхэлж, улмаар таны хувийн мэдээлэлд хандах эрх авах зорилготой юм.
Apple компани өөрийн хэрэглэгчдэдээ үргэлж анхааруулга өгдөг бөгөөд танихгүй эх сурвалжаас ирсэн мессеж, имэйл, линк дээр хэзээ ч дарахгүй байхыг зөвлөж байна. Хэрэв танд iCloud-ын багтаамжтай холбоотой асуудал тулгарвал Apple-ийн албан ёсны вэбсайтад шууд хандаж, өөрийн бүртгэлдээ нэвтрэн орж, мэдээллээ шалгаарай. Ямар ч тохиолдолд хувийн мэдээллээ гуравдагч этгээдэд өгөхөөс зайлсхийх хэрэгтэй.
Залуус та бүхэн цахим орчинд сонор сэрэмжтэй байж, өөрийгөө болон ойр дотны хүмүүсээ цахим гэмт хэргээс хамгаалах нь чухал юм. Хэрэв танд ямар нэгэн сэжигтэй зүйл ажиглагдвал хууль хяналтын байгууллагад мэдэгдээрэй.
