Алдарт реппер Jay-Z болон нэрт продюсер Рик Рубин нарын оролцсон “JAŸ-Z in 8” цувралын тав, зургаадугаар анги баасан гарагийн орой HBO Max сувгаар цацагдлаа. Тэд энэ удаагийн дугааруудаар уран бүтээлчийн дискографийг нарийвчлан авч үзэж, “Reasonable Doubt”-аас эхлээд “4:44” цомог, түүнчлэн 2021 онд “Donda” цомог дээр Ye (өмнөх нэрээр Канье Уэст)-тэй эргэн нэгдсэн үйл явдлын талаар ярилцсан байна.
Эдгээр ангиудад “JAIL”, “U Don’t Know”, “Politics as Usual”, “Regrets”, “Ignorant S—”, “Hovi Baby”, “Kill Jay-Z”, “99 Problems”, “Threat”, “Dead Presidents II” болон “Public Service Announcement (Interlude)” зэрэг олон бүтээлүүдийг задлан авч үзжээ. Зургаадугаар ангид Jay-Z-ийн Ye-ийн уран бүтээлч авьяас чадварыг өндрөөр үнэлсэн яриа багтсан бөгөөд энэ нь цахим сүлжээнд хүчтэй тархаад байна. Гэхдээ өнгөрсөн жил Ye түүний хүүхдүүд рүү чиглэсэн таагүй мэдэгдэл хийснээс хойш тэдний харилцаа өнөөдөр ямар түвшинд байгаа талаар тодорхой мэдээлэл өгөөгүй аж.
Үүнээс гадна Jay-Z “Goodfellas” киноноос сэдэвлэн “Threat” дуугаа хэрхэн бүтээсэн, “Public Service Announcement” дуу нь “The Black Album” цомогт бараг орохгүй шахсан тухай болон уг дууны гуравдугаар бадагт нэгэн сэтгүүлч хэрхэн нөлөөлсөн талаар хуваалцжээ. 56 настай реппер маань гэр бүлийн амьдрал, Бигги Смоллс нартай байсан харилцаа болон жирийн сонсогчид анзаараагүй өнгөрч байж болзошгүй үгсийн нарийн урлалаа чин сэтгэлээсээ тайлбарласан байна.
Баримтат кинонд өнгөрснийг эргэн дурсахад хүндрэлтэй байсан эсэхийг Billboard асуухад Jay-Z: “Юу ч хэцүү байгаагүй. Риктэй ярилцах маш амар байсан. Тэр амьдрал болон хөгжмийг маш их сонирхдог, бид хөгжимд адилхан хайртай тул яриа тун хялбар өрнөсөн” хэмээн хариулжээ. “JAŸ-Z in 8” цувралын төгсгөлийн анги ирэх баасан гарагт HBO Max-аар гарна.
