Америкийн алдарт рок хамтлаг Kings of Leon 2027 оны хоёрдугаар сарын 28-ны ням гарагт Австралийн Сидней хотын Centennial Park-д болох Sydney Summertime цуврал тоглолтыг тэргүүлэн оролцохоор болжээ. Харин энэхүү тоглолтод Австралийн Ocean Alley хамтлаг тусгай зочноор оролцох юм.
Энэхүү цуврал задгай тоглолтыг Black Peach компани зохион байгуулж байгаа бөгөөд Kings of Leon нь тус наадмын хоёр дахь гол хамтлагаар зарлагдаж байна. Наадмын эхний тоглолтыг хоёрдугаар сарын 20-нд The Strokes хамтлаг Beck, Courtney Barnett болон Promiseland нарын хамт нээх ажээ.
Kings of Leon хамтлаг саяхан өөрсдийн бие даан продюсерлосон анхны бүтээл болох 10 дахь студийн цомог O My Beloved-оо зарласан юм. Тус цомог 11 дүгээр сарын 6-нд Love Tap Records болон Virgin Music Group-ээр дамжин гарах бөгөөд цомгийн тэргүүн сингл болох “My Whole World” дуу нь аль хэдийн цацагджээ. Хамтлагийн гоцлол дуучин Калеб Фоллоуилл цомгийн талаар ярихдаа "Бидний хийсэн бүхнээ эргэн харж, өнөөдрийн түвшинд хэрхэн хүрснээ үнэлсэн цомог гаргавал сайхан биш гэж үү хэмээн бодсон" гэж онцолсон байна.
Бүх насныханд нээлттэй уг тоглолтын тасалбарын урьдчилсан худалдаа 10 дугаар сарын 22-ны пүрэв гарагт эхлэх бөгөөд үндсэн худалдаа 10 дугаар сарын 27-нд эхэлнэ. Зохион байгуулагчдын зүгээс ирэх саруудад олон улсын болон Австралийн бусад голлох уран бүтээлчдийг зарлахаа мэдэгдээд байна.
