Apple компани энэ зун MacBook Neo зөөврийн компьютерынхоо үнийг 100 ам.доллароор нэмсэн ч уг төхөөрөмж үнэ цэнээ хадгалсан хэвээр байна. Зах зээл дээрх томоохон жижиглэн худалдаалагчид одоогоор дорвитой хямдрал зарлаагүй байгаа бөгөөд тухайлбал Amazon уг төхөөрөмжид ердөө 10 ам.долларын хөнгөлөлт үзүүлж, 689 ам.доллароор худалдаалж байна.
Уламжлал ёсоор уг компьютерыг хамгийн хямдаар авах гол арга нь их сургуулийн оюутнууд, тэдний эцэг эх болон багш нарт зориулсан Apple Store-ийн боловсролын хөнгөлөлт байдаг. Уг хөнгөлөлтөөр 100 ам.доллар хасагдаж, үндсэн үнэ нь 599 ам.доллар болдог. Өмнө нь оюутны үнэмлэхгүй байсан ч энэхүү хөнгөлөлтийг ашиглах боломжтой байсан бол одоо энэ боломж хаагджээ.
Сэргээн засварласан төхөөрөмжийн сонголт
Харин оюутны хөнгөлөлт эдлэх эрхгүй хэрэглэгчдэд зориулсан өөр нэгэн боломж байгаа нь сэргээн засварласан (Certified Refurbished) төхөөрөмж худалдан авах юм. Apple Store албан ёсоор шалгаж сэргээн засварласан MacBook Neo загваруудаа 120 ам.доллар хүртэлх хямдралтай үнээр санал болгож байна.
Эдгээр Certified Refurbished төхөөрөмжүүд нь өмнө нь ашиглагдаж байсан боловч бүрэн ажиллагаатай эсэхийг нь шалгасан бөгөөд нэг жилийн баталгаатай ирдэг. Үнийн хувьд 256GB багтаамжтай суурь загвар нь 599 ам.доллар (шинэ нь 699 ам.доллар), харин 512GB багтаамжтай, Touch ID-тай хувилбар нь 679 ам.доллароор (шинэ нь 799 ам.доллар) худалдаалагдаж байна. Мөн Citrus, Silver, Indigo, Blush гэсэн дөрвөн өнгийн сонголттой байна.
Түүнчлэн Best Buy сүлжээ дэлгүүр Geek Squad-аар сэргээн засварласан 256GB загварыг 599 ам.доллароор зарж байгаа бол цоо шинэ загварыг нь 699 ам.доллароор 25 ам.долларын Starbucks бэлгийн картын хамт санал болгож байна.
