Дэлхийн поп хөгжмийн хатан хаан гэгддэг Мадонна өөрийн Инстаграм хуудсаа устгаж, шинэ цомог гаргах гэж байгаагаа саяхан зарлалаа. Тэрээр өөрийн алдартай “Hung Up” дууны үгийг тийзэр хэлбэрээр цацаж, вэбсайтаа шинэчилж “Confessions II” гэсэн үгийг тодоор харуулсан байна. Энэ нь 2005 онд гарсан, дэлхий даяар хит болсон “Confessions on a Dance Floor” цомгийн үргэлжлэл байх магадлалтай гэсэн таамаг дэвшүүлж байна.
Мадонна (жинхэнэ нэр нь Мадонна Луиз Чикконе) бол Америкийн дуучин, хөгжмийн зохиолч, жүжигчин бөгөөд поп хөгжмийн түүхэнд хамгийн нөлөө бүхий уран бүтээлчдийн нэг юм. Тэрээр хөгжмийн карьерынхаа туршид олон тооны шагнал хүртэж, дэлхий даяар сая сая цомог борлуулсан.
Залуу үеийнхний хувьд Мадоннагийн шинэ цомог гарах нь диско хөгжмийн эрин үе рүү буцаж, бүжгийн талбарт өөрийгөө бүрэн дүүрэн илэрхийлэх боломж гэж үзэж байна. Түүний эргэн ирэлт нь хөгжмийн ертөнцөд шинэ өнгө төрх нэмж, залуусын зүрх сэтгэлийг эзэмдэх нь дамжиггүй.
