Америкийн алдартай инди рок хамтлаг Modest Mouse-ийн гитарчин Симон О'Коннор удахгүй эхлэх Хойд Америкийн аялан тоглолтод оролцохгүй болохыг хамтлагийн зүгээс албан ёсоор мэдэгдлээ. Энэхүү шийдвэр нь гитарчин Симон О'Коннорыг насанд хүрээгүй хүнд сошиал медиагаар зүй бус зурвас илгээсэн гэх ноцтой мэдээлэл гарсны дараа гарчээ.
Хамтлагийн Instagram хуудсанд нийтэлсэн мэдээлэлд дурдсанаар, аялан тоглолтын үеэр Симон О'Коннорыг Les Savy Fav хамтлагийн гитарчин Сет Жабур орлох болно. Хамтлагийнхан “Симон О'Коннор бидэнтэй хамт аялан тоглолтод явахгүй. Харин сайн мэдээ гэвэл Les Savy Fav хамтлагийн Сет Жабур гитар тоглохоор нэгдэж байна” хэмээн бичжээ. Гэвч хамтлагийн зүгээс Симон О'Коннор хамтлагийн гишүүн хэвээр үлдэх эсэх болон энэ асуудлын талаар нэмэлт дэлгэрэнгүй мэдээлэл өгөөгүй байна.
Энэхүү аялан тоглолт нь тус хамтлагийн зургадугаар сард гаргасан найм дахь студийн цомог болох «An Eraser and a Maze»-ийн хүрээнд зохион байгуулагдах юм. Аялан тоглолт наймдугаар сарын 4-нд Калифорни мужийн Ожай хотоос эхэлж, аравдугаар сарын 24-нд Сакраменто хотод өндөрлөх хуваарьтай байна.
Симон О'Коннортой холбоотой асуудал өнгөрсөн долдугаар сарын сүүлчээр олон нийтийн сүлжээнд дэгдсэн юм. Reddit сүлжээний нэгэн хэрэглэгч түүнийг насанд хүрээгүй байх үед нь зүй бус зураг илгээж, биеийн галбир нь харагдсан зургуудад нь сэтгэгдэл бичсэн гэж буруутгасан байна. Үүний хариуд О'Коннор Reddit дээрх тайлбартаа дээрх үйлдлийг үгүйсгэж, өөрийг нь өдөөн хатгадаг хуурамч хаягтай хүн гэж андуурснаас ийм алдаа гарсан хэмээн мэдэгджээ. Тэрээр өөрийгөө насанд хүрээгүй хүмүүсийн эсрэг бэлгийн шинжтэй үйлдэл хийхийг эрс эсэргүүцдэг гэдгээ илэрхийлсэн байна.
