Эмо рок урсгалын томоохон төлөөлөгчдийн нэг My Chemical Romance (MCR) хамтлаг 2006 онд гаргасан алдарт The Black Parade цомгоороо ирэх долоо хоногт Billboard-ийн жагсаалтад томоохон үсрэлт хийх төлөвтэй байна.
Уг цомог энэ долоо хоногийн (10-р сарын 31-ний өдрөөр бүртгэгдсэн) Billboard 200 чартад 139 дүгээрт эрэмбэлэгдэж, тус жагсаалтад нийт 161 дэх долоо хоногтоо багтаж буй юм. Тэгвэл 10-р сарын 23-ны Баасан гарагт уг цомгийн 20 жилийн ойн тусгай хувилбар (20th Anniversary Deluxe Edition) худалдаанд гарсан нь ирэх долоо хоногийн тэргүүн байрын төлөөх өрсөлдөөнийг улам сонирхолтой болгож байна.
Энэхүү шинэ хувилбарт үндсэн 14 дуун дээр нэмэлтээр зургаан дуу багтсан бөгөөд үүнд тухайн үеийн B-side гурван дуу болон гурван амьд тоглолтын бичлэг багтжээ. Мөн 15 шинэ винил хувилбар, CD болон кассетны сонголтуудтайгаар биет хэлбэрээр хэвлэгдсэн нь борлуулалтын үзүүлэлтийг өндөр гаргах хүлээлтийг үүсгээд байна.
Хэрэв тус цомог Billboard 200-г тэргүүлж чадвал энэ нь хамтлагийн түүхэн дэх анхны 1-р байр болох юм. 2006 онд The Black Parade анх худалдаанд гарахдаа эхний долоо хоногтоо 240,000 хувь борлогдож, Майли Сайрусын "Hannah Montana" киноны цомгийн (281,000 хувь) ард орж, 2-р байрт бичигдэж байв.
Шинээр гарсан бусад уран бүтээлчдийн цомгууд тэргүүн байрын төлөө өрсөлдөх магадлал бага байгаа тул MCR ирэх долоо хоногт жагсаалтыг тэргүүлж буй дуучин Оливиа Родриготой өрсөлдөх төлөвтэй байна.
