NASCAR-ын түүхэн дэх хамгийн алдартай тамирчдын нэг, долоон удаагийн аварга Ричард Петти залуу тамирчдыг шүүмжилсэн нь спортын хүрээнийхний дургүйцлийг хүргэжээ. Тэрээр энэ жилийн All-Star уралдааны үеэр залуу үеийнхнийг "сонирхогчдын бөөгнөрөл" хэмээн нэрлэсэн нь олон нийтийн сүлжээнд хүчтэй шүүмжлэл дагуулаад байна.
Ялангуяа 2025 онд залуу тамирчин Коннор Зилиш-ийн талаар хэлсэн үг нь дахин сөхөгдөж, шүтэн бишрэгчдийг бухимдуулав. Петти тухайн үед Зилишийг зөвхөн хүчирхэг машин унасныхаа ачаар амжилтад хүрсэн гэж үзэж, түүнийг бусад жолооч нарын дунд өрсөлдөх чадвараа харуулаагүй хэмээн шүүмжилж байсан юм. Тэрээр "Түүнийг 25-р байрнаас эхлэн уралдаж, замаа засаж байгааг харахгүй байна" хэмээн онцолж байв.
Гэвч бодит байдал дээр залуу тамирчин Зилишийн NASCAR-ын Cup Series-ийн анхны улирал Петтигийн хэлснээс тэс өөрөөр өрнөж байна. Одоо Trackhouse Racing багт уралдаж буй 20 настай Зилиш нь улирлын туршид олон бэрхшээлтэй тулгарч, тэмцээний хүснэгтийн 34-р байранд бичигдэж байна. Тэрээр нийт найман удаа уралдаанаас хасагдаж, ердөө нэг удаа эхний 10-т орсон үзүүлэлттэй байгаа юм.
Хэдийгээр үр дүн нь тааруу байгаа ч Зилиш хүнд хэцүү нөхцөлд өрсөлдөх чадвараа харуулсаар байна. Тухайлбал, Дарлингтонд 32-р байрнаас уралдаан эхлүүлж 18-р байранд орсон бол, COTA-д 25-р байрнаас 14-р байр хүртэл урагшилж чаджээ. Түүнчлэн багийн техникийн асуудал болон азгүйтлүүд түүнийг байнга дагаж байгаа нь Петтигийн "хүчирхэг машинаар хялбар уралддаг" гэх дүгнэлтийг үгүйсгэж байна.
NASCAR-ын шүтэн бишрэгчид Петтиг орчин үеийн уралдааны онцлогийг ойлгохгүй байна гэж үзэж байгаа бөгөөд түүнийг "энэ спорт түүнийг аль хэдийн гүйцэж түрүүлжээ" хэмээн шүүмжилж байна.
