Америкийн хөлбөмбөгийн NFL лигийн «Индианаполис Колтс» багийн эзэн Карли Ирсей-Гордон тоглолтын үеэр талбайн хажууд чихэвчтэй, төрөл бүрийн бичиг цаас барин зогсож байгаа нь олны анхаарлыг татаж, шүүмжлэл дагуулаад байна. Тэрээр 2025 оны тавдугаар сард эцэг Жим Ирсейгээ нас барсны дараа тус багийн эзэмшлийн эрхийг авсан бөгөөд ESPN-ийн мэдээлснээр талбайн захад ингэж ажиллах нь түүний хувьд шинэ зүйл биш аж.
Саяхан тэрээр тоглолтын үеэр дасгалжуулагч дээр очиж, тактик буюу тоглолтын хувилбартай холбоотой байж болзошгүй зүйлийг ярилцсан нь цахим орчинд хүчтэй тархжээ. Үүний дараа «The Ringer»-ийг үүсгэн байгуулагч Билл Симмонс өөрийн подкастаар дамжуулан багийн эзэн хүн талбайн захад тэмдэглэл хөтлөөд зогсож байх нь байж боломгүй зүйл хэмээн шүүмжилсэн байна. Мөн тэрээр хэрэв эрэгтэй эзэн ингэсэн бол бүгд шоолох байсан гээд, «Даллас Ковбойс»-ын эзэн Жерри Жонс хүртэл ингэдэггүй гэдгийг дурджээ.
Давхар стандарт ба мэргэжилтнүүдийн байр суурь
Харин «Оклэнд Рэйдерс» багийн гүйцэтгэх захирал асан Эми Траск энэ талаар өөр байр суурь илэрхийлсэн байна. Түүний хэлснээр бусад олон багийн эзэд тусгай өрөөндөө суугаад утсаар дамжуулан талбай руу заавар өгөх, тоглогчийг суулгахыг шаардах зэргээр үйл явцад шууд оролцдог аж. Харин Ирсей-Гордон өөрийн оролцоогоо нуулгүй, бүх нийтийн нүдэн дээр ил тод ажиллаж байгаад шүүмжлүүлж байгаа нь шударга бус хэмээн Траск үзжээ. Түүнчлэн Америкийн хөлбөмбөгийн гүйцэтгэх ажилтан асан Майкл Ломбарди энэхүү шүүмжлэлийг хэт хөөргөсөн асуудал гэж үзсэн байна.
Карли Ирсей-Гордон «Front Office Sports Tonight»-д өгсөн ярилцлагадаа багийн тоглолтын үндсэн ойлголтыг тавдугаар ангийн түвшинд л ойлгодог гэдгээ хэлээд, асуулт асууж, бусдыг сонсох нь сайн удирдагчийн чанар гэж үздэгээ хуваалцжээ. «The Athletic»-ийн мэдээлснээр тэрээр бараг бүх бэлтгэл сургуулилалтад оролцож, скаутуудтай хамт явж, дасгалжуулагч нартай адил цагаар ажилладаг байна. Багийн ерөнхий менежер Крис Баллард өнгөрсөн жил түүнийг түүн шиг үйл явцдаа төвлөрдөг хүнийг харж байгаагүй хэмээн тодорхойлж байжээ.
