Охайо Стэйт (Ohio State) их сургуулийн америк хөлбөмбөгийн багийн түүхэн дэх бүх цаг үеийн бөмбөг барилт, зайн хэмжээ болон тачдауны рекордыг эвдээд буй залуу од Жеремиа Смит-тэй холбоотой нэгэн сонирхолтой түүхийг тус сургуулийн өмнөх үеийн тоглогч хуваалцжээ.
Өдгөө NFL-д дөрвөн жил тоглосон туршлагатай, Охайо Стэйт-ийн экс тамирчин Дэйн Санзенбахер өнгөрсөн жил шатахуун түгээх станц дээр Жеремиа Смиттэй таарсан ч өөрийгөө танилцуулж чадалгүй өнгөрсөн тухайгаа "97.1 The Fan" нэвтрүүлгийн 10-р сарын 7-ны дугаарт ярьсан байна. Тэрээр "Mercedes AMG машинтай ирсэн Смитийг шууд таньсан ч өөрийгөө хэн гэдгийг тайлбарлаж ойлгуулахад багагүй хугацаа орох байсан тул төвөгшөөсөн" хэмээн дурсжээ. Санзенбахер ажлын Subaru машинаасаа бууж, энгийн хувцастай явсан тул залуу тамирчин түүнийг танихгүй, зүгээр л нэг хөгжөөн дэмжигч гэж бодох эсвэл эвгүй сэтгэгдэл төрүүлэхээс болгоомжилсон аж.
Санзенбахер 2007-2010 оны хооронд Охайо Стэйт багт тоглож 124 барилт, 1,879 ярд зай, 19 тачдаун хийж байсан бөгөөд дараа нь NFL-ийн Чикаго Бэйрс болон Цинциннати Бенгалс багуудад тоглож байв.
Харин өдгөө шинэ үеийн од болоод буй Жеремиа Смит их сургуулийнхаа түүхэнд 34 тоглолтод 207 барилт, 3,381 ярд болон 36 тачдаун хийснээр өмнөх бүх дээд амжилтыг эвдээд байна. Тэрээр Эмека Эгбукагийн 205 барилт, Майкл Женкинсийн 2,898 ярд болон Крис Олавегийн 35 тачдауны амжилтыг давжээ. Түүнчлэн карьертаа 15 удаа 100-аас дээш ярд авсан үзүүлэлтээрээ Марвин Харрисонтой зэрэгцсэн бөгөөд 2027 оны NFL драфтын эхний сонголтоор нэрлэгдэх төлөвтэй байна.
Смит Iowa-тай хийсэн тоглолтын дараа CBS Sports-д өгсөн ярилцлагадаа зөвхөн багийн амжилтад анхаарч, үндэсний аварга шалгаруулах тэмцээнд түрүүлэхийг зорьж байгаагаа илэрхийлжээ. Одоогоор Охайо Стэйт баг 4-1 амжилттай улирлаа үргэлжлүүлж байна.
