Гэймерүүдэд зориулсан тоног төхөөрөмж үйлдвэрлэгч алдарт Razer брэнд Pokémon-ий 30 жилийн ойг тохиолдуулан шинэ цуглуулгаа танилцууллаа. Өмнө нь Gengar загварын чихэвч гаргаж байсан тус брэнд энэ удаад Sylveon, Charizard, болон Lucario дүрүүдээс сэдэвлэсэн гурван тусгай загварыг худалдаанд гаргаж байна.
Ягаан өнгийн пастел загвар: Sylveon Edition
Пастел өнгөтэй орчин бүрдүүлэх сонирхолтой тоглогчдод зориулсан Razer Kraken V4 X (Sylveon Edition) нь 109.99 ам.долларын үнэтэйгээр Target дэлгүүрт худалдаалагдаж байна. Энэхүү утастай USB-C чихэвч нь Sylveon-ий тууз, нумыг санагдуулам ягаан болон цэнхэр өнгөний хослолтой бөгөөд Razer Chroma RGB гэрэлтүүлэгтэй. Мөн тоглоомын дуугаралтыг тод дамжуулах 40мм-ийн TriForce драйвер, 7.1 surround sound систем, дуу чимээ сайн тусгаарлах хураагддаг HyperClear микрофонтой аж.
Галт дүр төрхтэй утасгүй хувилбар: Charizard Edition
Утасгүй эрх чөлөөг эрхэмлэдэг хүмүүст зориулсан Razer BlackShark V3 X HyperSpeed (Charizard Edition) нь 119.99 ам.доллароор Razer-ийн албан ёсны дэлгүүрт зарагдаж байна. Хар, улаан болон улбар шар өнгийг хослуулсан, 270 грамм жинтэй энэхүү esports загвар нь 2.4GHz HyperSpeed Wireless, Bluetooth болон USB утсаар холбогдох боломжтой. Энэ нь PC, PlayStation, гар консол болон гар утсанд ажиллах ба нэг удаагийн цэнэглэлтээр 70 цаг хүртэл ажиллах батарей, 50мм-ийн TriForce Gen-2 драйвертай юм.
Тулаанд бэлэн: Lucario Edition
Цэнхэр болон хар өнгө, бэхэн хэв маягийн график бүхий Razer BlackShark V3 X HyperSpeed (Lucario Edition) нь 139.99 ам.долларын үнэтэйгээр Target-д худалдаалагдаж байна. Энэ загвар нь Charizard хувилбарын адил 50мм-ийн драйвер, 70 цагийн батарей, PS5 Tempest 3D Audio болон PC 7.1 surround sound дэмжлэг, 270 грамм жин бүхий техникийн үзүүлэлтүүдийг бүрэн агуулжээ.
