Аймшгийн төрлийн алдартай Silent Hill цувралын шинэ анги болох Silent Hill: Townfall нь өмнөх тоглоомуудаасаа ялгаатай онцлогтойгоор гарахаар болжээ. Энэхүү тоглоомыг хөгжүүлэгч Screen Burn Interactive студийн зүгээс уг тоглоом нь нийт таван өөр төгсгөлтэй байхыг баталсан байна.
Шотландын Сент-Амелиа хэмээх зохиомол хотод өрнөх тус тоглоом нь анхны хүний байр сууринаас (first-person) тоглох сэтгэл зүйн аймшгийн тоглоом юм. Өмнөх ангиудаас ялгаатай нь энэ удаад тулалдахаас илүүтэйгээр нуугдаж, чимээгүй явах буюу стелс (stealth) үйлдлийг илүү чухалчилжээ.
Хэдийгээр тоглоомын явцын хувьд өөрчлөлтүүд орсон ч цувралын уламжлалт шинж чанаруудыг хадгалж үлдсэн байна. Тухайлбал, Silent Hill цувралын бусад тоглоомуудын адил тоглогчийн тоглолтын явцад гаргасан сонголт, шийдвэрүүд нь түүхийн төгсгөлд шууд нөлөөлөх юм.
