Рок хөгжмийн ертөнцөд томоохон байр суурь эзэлдэг Америкийн алдарт Soundgarden хамтлагийнхан талийгаач дуучин Крис Корнелл-ийн оролцсон сүүлийн бичлэгүүдийг эмхэтгэн, шинэ цомог гаргахаар шаргуу ажиллаж байна. Энэ тухай хамтлагийн бөмбөрчин Мэтт Кэмерон саяхан "Let There Be Talk" подкастад оролцохдоо хуваалцжээ.
Тус хамтлаг 2013, 2014 оны үеэс эхлэн демо бичлэгүүдээ солилцож, хамтран ажиллаж байсан бөгөөд 2017 онд Крис Корнеллийг таалал төгсөхөөс өмнө хэд хэдэн студид хамтдаа бэлтгэл хийж, дуунуудаа бэлтгэж байсан аж. Одоогийн байдлаар үлдсэн гишүүд болох Мэтт Кэмерон, гитарчин Ким Тайил, басс гитарчин Бен Шеперд нар найман дуунаас бүрдэх цомог дээр ажиллаж байгаа бөгөөд продюсер Терри Дэйттэй хамтран дуугаралтыг нь сайжруулж байна.
Хамтлагийнхан энэхүү үйл явцыг "шүүх эмнэлгийн шинжилгээ хийхтэй ижил" нарийн ажиллагаа хэмээн тодорхойлж байгаа бөгөөд Крис Корнеллийн гитар тоглосон бичлэгүүд болон бэлтгэлийн үеийн материалуудыг ашиглаж байгаа юм. Одоогоор цомгийн нэр болон худалдаанд гарах тов тодорхойгүй байна.
Мэтт Кэмерон энэ талаар "Бид үүнийг дуусгаж, сонсогчдод хүргэхийг тэсэн ядан хүлээж байна. Энэ нь сэтгэл хөдлөлийн хувьд амаргүй ч, бидний хувьд энэ бол жинхэнэ Soundgarden-ийн дуугаралт юм" хэмээн сэтгэгдлээ хуваалцжээ. Хамтлагийнхан одоогийн байдлаар дуунуудын найруулгыг хийж, ажлыг эцсийн шатанд хүргэхийг зорьж байгаа ажээ.
