Strategy компани STRC давуу эрхийн хувьцааныхаа үнийг 100 ам.долларын түвшинд буцаан авчрах зорилгоор хувьцаа буцаан худалдан авах хөтөлбөрийнхөө төсвийг 2 тэрбум ам.доллар болгон хоёр дахин нэмэгдүүллээ. Майкл Сэйлорын 9 дүгээр сарын 8-ны өдрийг хүртэл тооцоолсон сэргэлтийн хугацаа ирсэн ч STRC-ийн үнэ 100 ам.долларт хүрч чадаагүй тул захирлуудын зөвлөл энэхүү шийдвэрийг гаргасан байна.
Компанийн анхны баталсан 1 тэрбум ам.долларын төсөв дуусахад ойртоод байсан юм. STRC.live платформын мэдээллээр уг хувьцааны ханш мягмар гарагт 97-98 ам.доллар орчимд арилжаалагдаж, зорилтот түвшнээс 2 орчим хувиар доогуур байв.
Худалдан авалтын дүн нэмэгдсэн нь
Компанийн удирдлагууд анх STRC-ийн ханш 100 ам.доллароос бага байх үед түлхүү худалдан авч, улмаар үнэ нь 100 ам.долларт дөхөх тусам зах зээлийн эрэлт нэмэгдэж худалдан авалтаа багасгана гэж төлөвлөж байсан юм. STRC хувьцаа тус хөтөлбөр эхлэхээс өмнө 71 ам.доллар хүртэл унаад байжээ. Гэвч бодит байдал дээр ханш өсөх тусам компанийн зарцуулах мөнгөний хэмжээ эсрэгээрээ өссөн байна.
Тухайлбал, 8 дугаар сарын 31-нээс 9 дүгээр сарын 7-ны хооронд тус компани 1.81 сая STRC хувьцааг 176.3 сая ам.доллароор (дундаж ханш 97.36 ам.доллар) авсан нь долоо хоногийн хамгийн өндөр дүнтэй худалдан авалт болов. Ингэснээр 7 дугаар сараас хойш нийт зарцуулсан мөнгө 811.5 сая ам.долларт хүрсэн бөгөөд төсвийг нэмэгдүүлснээр одоо тэдэнд 1.19 тэрбум ам.долларын нөөц үлдэж байна.
Биткойн худалдан авалт дахин зогсов
Энэхүү шийдвэр нь өмнөх долоо хоногийн хөрөнгийн хуваарилалтаас эрс өөрчлөгдсөнийг харууллаа. Тус компани өмнөх тайлант хугацаанд MSTR хувьцааны арилжаагаар 602.8 сая ам.доллар босгож, үүнээс 151.8 саяыг STRC худалдан авалтад, 369.7 саяыг 4,603 ширхэг биткойн худалдан авахад зарцуулсан байв. Энэ нь хоёр сар завсарлаад байсан биткойны хуримтлалыг эхлүүлсэн ч ердөө ганцхан долоо хоног үргэлжилж, ийнхүү дахин зогслоо.
