Өмнөд Солонгосын алдарт Stray Kids хамтлаг Латин Америк дахь аялан тоглолтынхоо хүрээнд Мексикийн Мехико хотын «GNP Seguros» цэнгэлдэх хүрээлэнд STRAYCITY нэртэй фестивал хэлбэрийн томоохон тоглолтоо толилууллаа. Ocesa-гийн мэдээлснээр уг арга хэмжээнд 60,000 орчим үзэгч цугласан байна.
Бан Чан, Ли Ноу, Чанбин, Хёнжин, Хан, Феликс, Сынмин, Ай Эн нарын бүрэлдэхүүнтэй тус хамтлаг 17 сарын өмнө анх энэхүү цэнгэлдэхэд тоглож байсан бөгөөд ийнхүү дахин эргэн иржээ. Тоглолтын өмнө Өмнөд Солонгос-Японы хамтарсан Nexz хамтлаг болон Мексикийн дуучин Renee, Андрес Обрегон нар тайзнаа гарсан байна.
Stray Kids тоглолтын үеэр «TOPLINE», «S-Class», «MANIAC», «God’s Menu», «Chk Chk Boom» болон «LALALALA» дууны рок хувилбар зэрэг шилдэг бүтээлүүдээ хүргэжээ. Цэнгэлдэхэд цугласан STAY шүтэн бишрэгчид өөрсдийн «Nachimbong» гэрэлт саваагаар цэнгэлдэхийг гэрэлтүүлсэн байна.
Уг тоглолтыг Өмнөд Солонгос улсын ерөнхийлөгч И Жэ Мён гэргий Ким Хэ Гёны хамт үзэж сонирхсон бөгөөд тэргүүн хатагтай гэрэлт саваа барин хөгжөөн дэмжжээ. Ерөнхийлөгч И Жэ Мён Мексикт хийсэн албан ёсны айлчлалынхаа төгсгөлд энэхүү тоглолтыг үзэж, улмаар X сүлжээндээ «Солонгос, Мексикийн дээд хэмжээний уулзалтыг тохиолдуулан зохион байгуулсан тоглолтын бичлэгээс» хэмээн нийтэлж, K-pop-ын хүч чадлыг онцолсон байна.
Мөн Мексикийн Соёлын сайд Клаудия Куриэль де Икаса эмзэг бүлгийн 10 хүүхдийн хамт хүрэлцэн ирсэн бөгөөд эдгээр хүүхдүүдэд тоглолтын тасалбар бэлэглэснийг Мексикийн ерөнхийлөгч Клаудия Шейнбаум өмнөх өдөр нь зарласан байжээ.
