Өмнөд Солонгосын алдарт хөвгүүдийн хамтлаг Stray Kids өөрсдийн шинэ «THIS & THAT» мини цомгоо шүтэн бишрэгчиддээ хүргэлээ. Энэхүү найман дуутай цомог нь шөнө дунд албан ёсоор цацагдсан юм.
Цомгийн нээлтийн дуу болох «RUN IT»-ийг хамтлагийн дотоод продюсерын баг болох 3RACHA (Бан Чан, Чанбин, Хан) нар бичиж, хөгжмийн найруулгыг нь хийжээ. Хамтлагийн зүгээс мэдээлснээр, энэхүү дуу нь тэдний даруухан эхлэлээс эхлээд «Сөүлээс дэлхий дахин» хүртэлх өсөлт дэвшлийн түүхийг өгүүлдэг байна. Мөн бэрхшээл, хязгаарлалтыг даван туулж, ялалт өөд тэмүүлэх шийдэмгий байдлыг илэрхийлжээ.
Stray Kids хамтлаг өмнө нь Billboard 200 жагсаалтад найман удаа орж, бүгд нэгдүгээр байранд дебют хийж байсан түүхтэй. Тэд 2024 онд «HOP» цомгоороо Billboard-ийн 69 жилийн түүхэнд анхны зургаан цомгоороо жагсаалтыг тэргүүлсэн анхны уран бүтээлчид болсон юм. Түүнчлэн «KARMA» болон «DO IT» цомгуудаараа уг амжилтаа үргэлжлүүлсэн билээ.
Тэдний амжилт үүгээр зогсохгүй. 2025 онд гаргасан «SKZ IT TAPE DO IT» микстэйпийн дараа Stray Kids нь RIAA-аас алтан цомгийн батламжийг хамгийн олон авсан K-pop уран бүтээлчээр тодорчээ. Тэд мөн 2023 оны Billboard Music Awards-аас «Шилдэг K-pop цомог», 2024 оны People’s Choice Awards-аас «Оны шилдэг хамтлаг» зэрэг олон шагналыг хүртээд байна.
Одоогоор хамтлаг дэлхийг тойрсон аялан тоглолтоо үргэлжлүүлж байгаа бөгөөд ирэх сард Бразилд болох Rock in Rio хөгжмийн наадамд оролцох анхны K-pop уран бүтээлчид болох гэж байна. Үүнээс гадна, есдүгээр сарын 9-нд Богота хотоос эхлэн Аргентин, Колумб, Мексик улсуудад «STRAYCITY» нэртэй цуврал тоглолтуудаа хийхээр төлөвлөжээ. The Action Network-ийн судалгаагаар Stray Kids-ийн шүтэн бишрэгчид нь онлайн орчинд хамгийн аз жаргалтай хөгжмийн хорхойтнууд гэж нэрлэгдсэн байна.
