Temper City хамтлаг өөрсдийн гаргасан анхны дуу болох "Self Aware"-аар Billboard-ын Alternative Airplay чартыг тэргүүлж, түүхэн амжилт үзүүллээ. Долдугаар сарын 25-ны өдрийн байдлаар тус дуу жагсаалтын оргилд гарсан нь хамтлагийн хувьд Billboard-ын аливаа жагсаалтад эзэлж буй анхны тэргүүн байр юм.
Тус гурвал хамтлаг нь 2026 онд Alternative Airplay жагсаалтыг анх удаа тэргүүлж буй зургаа дахь уран бүтээлч болж байна. Тэднээс өмнө Young the Giant, Edgehill, YUNGBLUD, The Paradox болон Good Charlotte нар энэ онд ийм амжилтад хүрсэн юм. "Self Aware" дуу нь гарсан цагаасаа хойш 14 дэх долоо хоногтоо жагсаалтыг тэргүүлж байгаа бөгөөд энэ нь анхны дуугаараа ийм хурдан амжилтад хүрсэн тохиолдлуудын нэг болжээ.
Үүнээс гадна тус бүтээл Rock & Alternative Airplay чартад хоёрдугаар байрт тогтвортой хэвээр байна. Luminate байгууллагын мэдээлснээр, долдугаар сарын 16-нд дууссан долоо хоногт тус дуу 4.4 сая сонсогчийн хандалтыг авч, өмнөх долоо хоногоос 23 хувиар өссөн үзүүлэлттэй байна. Мөн Hot Rock & Alternative Songs жагсаалтын 9-р байрт, Billboard Hot 100 жагсаалтын 47-р байрт тус тус эрэмбэлэгджээ.
Долдугаар сарын 10-наас 16-ны хооронд тус дуу АНУ-д 6.3 сая удаа стриминг хийгдэж, 4.5 сая сонсогчийн хандалт авсан байна. Temper City хамтлаг нь Израил улсын гурван гишүүнээс бүрддэг бөгөөд Лос-Анжелес хотод байгуулагдсан юм. Одоогоор "Self Aware" нь тус хамтлагийн гаргасан цорын ганц уран бүтээл хэвээр байна.
