Алдартай рок хамтлаг The 1975-ын гоцлол дуучин Мэтти Хили болон загвар өмсөгч Габриетт (жинхэнэ нэр нь Габриэлла Бехтел) нар хуримын ёслолынхоо бэлтгэлийг хийж байх үедээ папараццид өртжээ. Калифорни мужийн Лос-Анжелес хотын орчимд болсон уг үйл явдлын бичлэгийг TMZ агентлаг олон нийтэд дэлгэсэн байна.
Хар өнгийн хувцас ижилсүүлэн өмссөн хос гадаа талбайд хуримын ёслолынхоо хэсгээс давтаж, романтик байдлаар бүжиглэн үнсэлцэж байгаа нь бичлэгт тод харагджээ. Мөн Мэтти Хили өөрийн сүйт бүсгүйтэй Rolls-Royce хөлөглөн явж байхдаа папарацци нартай эелдэг харилцаж, хуримын баярын үйл ажиллагаа үргэлжилж байгааг дурдсан байна. Габриеттийн хэлснээр, тэдний баярын үйл ажиллагаа ойрын өдрүүдэд үргэлжлэх аж.
Хуримын баярын өмнөхөн Мэтти Хили өөрийн нэрэмжит сүйт залуугийн үдэшлэг зохион байгуулсан байна. Энэхүү арга хэмжээнд The 1975 хамтлагийн дууг дуулдаг 9075 хамтлаг оролцсон бөгөөд дуучин залуу тайзан дээр гарч, өөрийн хамтлагийн нөхдийн хамтаар хөгжилдөж байгаа нь дүрс бичлэгт үлджээ.
Тэдний сүй тавьсан тухай мэдээлэл өнгөрсөн оны зургаадугаар сард анх олон нийтэд ил болсон юм. Мэттигийн ээж, Британийн алдарт нэвтрүүлэгч Дениз Уэлч өөрийн нэвтрүүлгээр дамжуулан хүүгийнхээ сүй тавьсан тухай баталж, хар алмазан шигтгээтэй бөгжний талаар дурссан байдаг. Тэрээр Габриеттийг бэр болоход нь туйлын баяртай байгаагаа илэрхийлж байв.
