Найруулагч Кристофер Ноланы шинэ бүтээл «The Odyssey» киног үзэж буй хүмүүс танхимаас гарахдаа яг л гол дүрийн баатар Одиссей шиг урт бөгөөд хүнд аяллыг туулсан мэт мэдрэмж авч байгаагаа илэрхийлж байна. Энэ нь тус киног 4DX форматаар үзэж буй үзэгчдэд илүү хамааралтай юм.
4DX гэдэг нь 2009 онд Өмнө дэлхийн «CJ 4DPLEX» компаниас бүтээсэн технологи бөгөөд киноны үйл явдалтай уялдуулан үзэгчдийн суудлыг хөдөлгөж, салхи, ус, манан, үнэр зэрэг байгалийн эффектүүдийг нэмж өгдөг. Киноны үеэр суудал нь нааш цааш хөдөлж, чичиргээ үүсгэхээс гадна үзэгчдийн толгойн орчимд агаар үлээх, ус цацах зэрэг олон төрлийн мэдрэмжийг төрүүлдэг байна.
Киноны туршлага уу, эсвэл сорилт уу?
Цахим орчинд тархаж буй бичлэгүүдээс харахад зарим үзэгчид энэхүү туршлагыг «эрүүдэн шүүлт» хэмээн нэрлэж байгаа ч энэ нь хүмүүсийн сонирхлыг улам бүр татах болжээ. Гэхдээ хэрэв ус цацах эффект таалагдахгүй бол суудалд байрлах тусгай товчлуураар үүнийг унтраах боломжтой. Харин суудлын хөдөлгөөнийг зогсоох боломжгүй аж.
Эдгээр эффектүүд нь автоматаар үүсдэггүй бөгөөд «CJ 4DPLEX» компанийн ажилтнууд киноны дүрс бүрийг нарийн судалж, хөдөлгөөн болон бусад нөлөөллийг хэдэн долоо хоногийн турш програмчилдаг байна. Тус компанийн гүйцэтгэх захирал Пол Кимийн хэлснээр, тэдний зорилго нь киноны үйл явдалтай хамгийн оновчтой нийцэх мөчүүдэд эффектүүдийг ашиглах явдал юм. «The Odyssey» киноны хувьд далайн шуурга, хөлөг онгоцны хөдөлгөөн, сум харвах зэрэг дүр зураг нь 4DX технологид маш их боломж олгож байгаа бөгөөд танхимууд дүүрэн үзэгчтэй байна.
Кино сонирхогчдын хувьд аль форматаар үзэх вэ гэдэг нь томоохон асуулт болоод байна. Нолан уг киног бүхэлд нь IMAX камер ашиглан зураг авалт хийсэн бөгөөд дэлхий даяар цөөн тооны театрт л 70мм-ийн форматаар гаргаж байгаа нь тасалбарыг хэдэн сарын өмнө дуусгахад хүргэжээ. Ийнхүү үзэгчид IMAX, стандарт 70мм, Dolby Cinema болон 4DX гэсэн олон сонголтын дунд эргэлзэж байна.
