АНУ-ын эрүүл мэндийн даатгалын гигант UnitedHealthcare компанийн гүйцэтгэх захирал Брайан Томпсоныг хөнөөсөн хэрэгт сэжиглэгдэж буй 26 настай Луижи Манжионегийн шүүх хурал олны анхаарлыг татсаар байна. Түүний өмгөөлөгчид дөнгөж өчигдөр шүүхэд “хэт сэтгэл хөдлөлийн хямрал”-ын улмаас гэмт хэрэг үйлдсэн гэх өмгөөллийн стратеги баримтлахаа мэдэгдээд байсан ч, ердөө 24 цагийн дараа энэ байр сууриа гэнэт өөрчилжээ.
Нью-Йорк мужийн шүүгчийн баримт бичгийг олон нийтэд ил болгосноос ердөө нэг хоногийн дараа Манжионегийн баг энэхүү төлөвлөгөөнөөсөө татгалзсан нь хуульчдын дунд хүлээлт үүсгээд байна. Сэтгэцийн эрүүл мэндийн байдлаар өмгөөлөл хийх нь ихэвчлэн ялын хэмжээг бууруулах эсвэл тусгай эмчилгээнд илгээх зорилготой байдаг ч, Манжионегийн шийдвэр нь хэргийн явцыг эрс өөрчилж магадгүй юм.
Луижи Манжионе нь өнгөрсөн оны сүүлээр Манхэттенд Брайан Томпсоныг буудан хөнөөсөн хэрэгт баривчлагдсан юм. Тэрээр хэргийн газраас зугтаж, удалгүй Пенсильвани мужид баригдсан бөгөөд түүнийг баривчлах үед “UnitedHealthcare” компанийн үйл ажиллагааг эсэргүүцсэн агуулгатай гар бичмэлүүд олдсон нь хэргийг улс төрийн эсвэл нийгмийн эсэргүүцлийн шинжтэй байж болзошгүй гэх таамаг дэвшүүлж байв.
Одоогоор өмгөөллийн баг нь ямар шалтгаанаар энэхүү стратегийг орхисон нь тодорхойгүй байгаа бөгөөд шүүх хурал үргэлжилж байна. Ажиглагчдын үзэж буйгаар, Манжионегийн энэхүү алхам нь түүнийг өөрийн үйлдлийнхээ хариуцлагыг бүрэн хүлээхэд бэлэн байгаа эсвэл өөр төрлийн өмгөөллийн стратегийг сонгосон байж болзошгүйг харуулж байна.
