WNBA буюу Америкийн эмэгтэйчүүдийн сагсан бөмбөгийн лигийн од тоглогч Кэйтлин Кларктай холбоотой маргаантай шийдвэр гарч, улмаар лигийн удирдлагууд үүнийг 140 минутын дараа залрууллаа. Тоглолтын гуравдугаар үеийн төгсгөлд Кларк талбайн шугамаас гарах үедээ шүүгчтэй мөргөлдсөн байна. Энэ үйлдлийг шүүгчид Кларкийг санаатайгаар шүүгч рүү дайрсан гэж үзэн техникийн алдаа оноосон юм.
Хэрэв энэхүү торгууль хэвээр үлдсэн бол Кларк улирлын турш авсан техникийн алдааныхаа тоогоор автомат нэг тоглолтын эрхээ хасуулах байсан бөгөөд энэ нь түүнийг Нью-Йорк Либерти багтай хийх чухал тоглолтыг өнжихөд хүргэх байв. Сэтгүүлч Скотт Агнессын мэдээлснээр, лиг уг алдааг 2 цаг 20 минутын дараа цуцалсан нь ердийнхөөс илүү хурдан хугацаанд хийгдсэн залруулга болжээ.
Индиана Фэвер багийн дасгалжуулагч Стефани Уайт уг шийдвэрийг эрс шүүмжилсэн байна. Тэрээр хэвлэлийн бага хурлын үеэр шүүгчдийн шийдвэрийг "муу дуудлага" хэмээн нэрлэж, өөрийнх нь техникийн алдааг ч мөн эсэргүүцлийнх нь төлөө өгсөн гэдгийг онцолжээ. Дасгалжуулагч Уайт "Түүнийг санаатайгаар шүүгч рүү дайрсан гэж хэлсэн. Энэ бол огт үндэслэлгүй зүйл" хэмээн шүүмжилсэн юм.
Кэйтлин Кларк өөрөө ч мөн бичлэгийг үзсэн бөгөөд санаатай үйлдэл хийгээгүй гэдгээ мэдэгдэж, алдааг цуцална гэдэгт найдаж байснаа илэрхийлжээ. Энэхүү явдал нь Индиана Фэвер баг улирлын төгсгөлийн чухал тоглолтуудад бэлтгэж буй энэ үед гарсан нь олны анхаарлыг татаад байна. Фэвер баг одоогоор 20-12 гэсэн амжилттайгаар лигийн хүснэгтийн дөрөвдүгээр байрт бичигдэж байна.
