WNBA буюу эмэгтэйчүүдийн сагсан бөмбөгийн лигийн Лас Вегас Эйсис багийн супер од А'жа Уилсон өөрийгөө бүх цаг үеийн хамгийн шилдэг тоглогч (GOAT) гэж үздэгээ илэрхийллээ.
Өмнө нь өөртөө ийм өндөр үнэлэлт өгөхөөс зайлсхийдэг байсан тэрээр сэтгүүлч Малика Эндрюстэй хийсэн ярилцлагын үеэр энэ тухайгаа зоригтойгоор хуваалцсан байна. Тэрээр: "Би өөрийнхөө нүдээр бол аль хэдийн тэнд хүрсэн. Би 1996 оноос хойш л шилдэг нь байсан. Энэ бол түүний нэг хэсэг л юм" хэмээн өөртөө итгэлтэйгээр хариулжээ. Уилсоны хувьд тэрээр төрсөн цагаасаа л энэхүү агуу замнал руу чиглэж ирсэн гэж үздэг байна.
Түүнийг бүх цаг үеийн шилдэг гэж үзэх нь зөвхөн сэтгэлийн хөөрөл биш бөгөөд гаргасан амжилтууд нь үүнийг баталдаг. А'жа Уилсон нь WNBA-ийн түүхэнд дөрвөн удаа улирлын MVP болсон цорын ганц тоглогч юм. Түүнчлэн тэрээр WNBA болон NBA-ийн түүхэнд нэг улирлын дотор улирлын MVP, шилдэг хамгаалагч (Defensive Player of the Year), финалын MVP, болон онооны аварга (Scoring Title) болсон анхны сагсан бөмбөгчин болсон билээ. Тэрээр мөн Лас Вегас Эйсис багийг удирдан гурван удаа WNBA-ийн аварга болгоод байна.
Зарим хүмүүс түүнийг карьерын урт хугацааны хувьд хараахан хангалттай биш гэж үздэг ч, Уилсон өөрийн амжилтаараа энэхүү шүүмжлэлийг үгүйсгэсээр байна. Тэрээр одоогийн амжилтандаа сэтгэл ханаж суулгүй, тав дахь MVP цомог эсвэл дөрөв дэх аваргын бөгжөө авахын тулд улам их хичээх болно гэдгээ мэдэгдлээ.
