АНУ-ын Огайо муж улсын Толедо хотод олон нийтийг хамарсан баярын үеэр буудалдаан гарч, олон хүн шархадсан харамсалтай хэрэг бямба гарагт гарлаа. Орон нутгийн цагаар 17:30 цагийн орчимд “Old West End” гудамжны баяр болж байсан газрын ойролцоо хүн буудуулсан гэх дуудлага цагдаагийн байгууллагад ирсэн байна.
Хэргийн газарт цагдаа нар шуурхай очиход буудалдааны улмаас олон хүн шархадсан байдалтай олдсон бөгөөд тэднийг даруй ойр орчмын эмнэлгүүд рүү хүргэжээ. Цагдаагийн газраас мэдээлснээр, хохирогчдын яг тодорхой тоо болон биеийн байдлын талаарх дэлгэрэнгүй мэдээлэл одоогоор тодорхойгүй байна.
Хэрэг гарах үед тус бүс нутагт иргэд олноор цугларсан, хөл хөдөлгөөн ихтэй байсан нь нөхцөл байдлыг улам хүндрүүлжээ. Одоогийн байдлаар хууль сахиулах байгууллагынхан гэмт этгээдүүдийг эрэн сурвалжлах ажиллагааг эрчимтэй үргэлжлүүлж байна. Хэргийн шалтгаан болон сэжигтнүүдийн талаарх мэдээллийг цагдаа нар нууцалж байгаа бөгөөд олон нийтийг сонор сэрэмжтэй байхыг анхаарууллаа.
АНУ-д олон нийтийн газруудад галт зэвсгийн халдлага гарах нь сүүлийн жилүүдэд тулгамдсан асуудал болоод байгаа билээ. Толедо хотын захиргаанаас уг хэргийн мөрдлөгийн явцын талаар удахгүй нэмэлт мэдээлэл өгөхөө мэдэгдсэн байна.
