АНУ-д реалити шоуны од, Лос-Анжелес хотын захирагчийн сонгуульд нэр дэвшигч Спенсер Пратт гэгч этгээд “супер мет” хэмээх маш хүчтэй метамфетамины тухай айдас төрүүлсэн мэдээлэл тарааж, сонгуулийн кампанит ажлаа идэвхжүүлж байгаа тухай Wired цахим хуудас мэдээллээ.
Спенсер Пратт нь MTV телевизийн “The Hills” реалити шоугаар олонд танигдсан нэгэн бөгөөд одоо улс төрд хүч үзэж байна. Тэрбээр нийгмийн сүлжээгээр дамжуулан “супер мет” гэх хар тамхины төрөл Лос-Анжелест аюул тарьж болзошгүй гэсэн цуурхал тарааж байгаа аж. Түүний үзэж байгаагаар энэ нь ердийн метамфетаминаас хамаагүй хүчтэй бөгөөд хор хөнөөлтэй гэнэ.
Гэвч хар тамхи судлаачид болон шинжээчид үүнийг үндэслэлгүй айдас төрүүлэх зорилготой, хар тамхины эсрэг кампанит ажлын нэг хэсэг гэж үзэж байна. Тэдний хэлж буйгаар “супер мет” гэх нэр томьёо нь шинжлэх ухааны үндэслэлгүй, зүгээр л олон нийтийг айлгах зорилготой юм байна. Хар тамхины хүч чадал нь түүний найрлага, тунгаас хамаардаг бөгөөд “супер мет” гэх тусгай төрлийн метамфетамин гэж байхгүй аж.
Мэргэжилтнүүд Спенсер Праттын энэ үйлдлийг улс төрийн зорилготой гэж шүүмжилж байна. Түүний кампанит ажил нь олон нийтийн анхаарлыг татах, айдас төрүүлэх замаар дэмжлэг авах гэсэн оролдлого гэж үзэж байгаа юм. Лос-Анжелесын иргэд болон залуучууд иймэрхүү худал мэдээлэлд автахгүй байхыг анхааруулж байна.
