Францын теннисчин Артур Жеа Лос-Кабос хотноо болсон ATP 250 цуврал тэмцээнд Денис Шаповаловыг ялж, карьерынхаа анхны ATP түрүүг хүртлээ. 2023 онд мэргэжлийн теннисний замналаа эхлүүлсэн 21 настай тамирчин маань энэхүү амжилтынхаа дараа Францын теннисийн холбоонд (FFT) хандан томоохон хүсэлт тавьжээ.
Жеа АНУ-ын нээлттэй тэмцээний оролцогчдын жагсаалт албан ёсоор хаагдах үед чансааны 127-р байрт бичигдэж байсан юм. Тиймээс тэрээр үндсэн сугалаанд оролцохын тулд урьдчилсан шатны гурван тойргийг давах эсвэл холбооноос олгох урилгыг (wildcard) авах шаардлагатай байгаа аж. "Энэ долоо хоногт гаргасан амжилтынхаа дараа би үүнийг хүртэх эрхтэй гэж бодож байна" хэмээн тэрээр сэтгэгдлээ илэрхийлжээ.
Түүний чансаа энэхүү ялалтын дараа 45 байраар ахиж, дэлхийн шилдэг 82-р тамирчин болох төлөвтэй байна. Энэ нь түүний хувьд карьерынх нь хамгийн өндөр үзүүлэлт болох юм. Хэдийгээр Жеа өөрийн боломжоо өндрөөр үнэлж байгаа ч АНУ-ын нээлттэй тэмцээний урилга авах нь тийм ч амар биш юм. Учир нь урилгын ихэнх нь Америкийн тамирчдад олддог бөгөөд гадаадын тоглогчдод цөөн тооны сул орон зай үлддэг.
Түүнчлэн, Францын алдарт теннисчин Гаэль Монфис ч мөн урилга авах өрсөлдөөнд байгаа нь Жеагийн хувьд хүндрэл учруулж болзошгүй байна. Монфис нь үзэгчдийн дунд нэр хүндтэй төдийгүй зодог тайлах дөхөж байгаа тул холбооны зүгээс түүнд давуу тал олгох магадлалтай гэж үзэж байна.
Жеа өмнө нь Австралийн нээлттэй тэмцээнд урьдчилсан шатнаас амжилттай шалгарч, Францын нээлттэй тэмцээнд урилгаар оролцож байсан туршлагатай. Гэсэн хэдий ч Францын нээлттэй тэмцээний үеэр тэрээр эрүүл мэндийн асуудлаас болж хүндрэлтэй тулгарч байсан удаатай.
