Америкийн поп хөгжмийн домогт дуучин, "Mandy" дуугаараа алдартай Барри Манилоу Кентакки мужийн Лексингтон хотын Rupp Arena-д тоглох байсан тоглолтоо хоёр дахь удаагаа хойшлууллаа. Тэрээр наймдугаар сарын 4-ний өдөр болох байсан тоглолтыг "урьдчилан таамаглах боломжгүй нөхцөл байдал" үүссэнтэй холбогдуулан цуцалсан байна.
Дуучны Instagram хуудсаар дамжуулан энэ тухай мэдээлсэн бөгөөд одоогоор тоглолт хойшлогдсон тодорхой шалтгааныг албан ёсоор мэдээлээгүй байна. Billboard сэтгүүлийн зүгээс дуучны төлөөлөгчтэй холбогдож тайлбар авахыг хүссэн боловч хариу өгөөгүй байгаа ажээ. Тус тоглолтыг зохион байгуулагч Rupp Arena-аас урьдчилж худалдаж авсан бүх тасалбарыг шинээр товлогдох тоглолтын үеэр хүчинтэйд тооцно хэмээн мэдэгдсэн байна.
Манилоу анх гуравдугаар сарын 9-нд уг тайзан дээр тоглох төлөвлөгөөтэй байсан ч уушгины хорт хавдрын эмчилгээ хийлгэж байсан тул тоглолтоо хойшлуулж байсан юм. Тэрээр өнгөрсөн тавдугаар сард "Good Morning America" нэвтрүүлэгт өгсөн ярилцлагадаа хавдрын эсрэг тэмцлийнхээ талаар ярихдаа биеийн байдал нь сайжирч байгааг дурдсан байдаг. Гэсэн хэдий ч өмнө нь уушгины хатгалгааны улмаас эрчимт эмчилгээний тасагт хэвтэж, нөхөн сэргээх эмчилгээ нь удаан үргэлжилсэн байна.
Шүтэн бишрэгчид нь түүнийг хурдан эдгэрэхийг хүсэн ерөөж, олон арван жилийн турш үзэгчдэдээ үнэнч байсаар ирсэн дуучныг дэмжиж байгаагаа илэрхийлжээ. Барри Манилоу нь 1970-аад оноос хойш зургаан арван жилийн турш Billboard-ийн жагсаалтад багтаж чадсан цорын ганц уран бүтээлч бөгөөд зургадугаар сард 15 жилийн дараах анхны цомгоо гаргасан юм. Одоогоор тэрээр наймдугаар сарын 5-нд Цинциннати хотод болох тоглолтын хуваарьтай хэвээр байна.
