Дэлхийн кино театруудаас бараг 2.5 тэрбум ам.долларын орлого олж, 2026 оны хамгийн өндөр орлоготой төдийгүй бүх цаг үеийн гурав дахь өндөр ашигтай кино болсон "Spider-Man: Brand New Day" албан ёсоор гэрийн дижитал хувилбараар үзэгчдэд хүрч эхэллээ.
Найруулагч Дестин Дэниел Креттоны найруулсан тус кинонд өмнөх ангиудын гол дүрүүд болох Том Холланд (Питер Паркер), Зендея (Эм Жей), Жейкоб Баталон (Нед) нараас гадна Marvel-ийн бусад цувралын дүрүүд болох Жон Бернтал (Фрэнк Касл/Панишер), Майкл Мандо (Мак Гарган/Скорпион), Марк Руффало (Брюс Бэннер/Халк) болон шинэ дүр Сэди Синк нар тогложээ.
Уг киноны үйл явдал "Spider-Man: No Way Home" киноноос дөрвөн жилийн дараа өрнөнө. Өөрийг нь хэн ч санахгүй болсон ертөнцөд Питер Паркер гэмт хэрэгтэй тэмцэхийн сацуу биеийн мутаци, толгой өвдөлт, ухаан алдалттай нүүр тулж, Нью-Йорк хотын иргэдийг хүүхэлдэй мэт удирдан эзэмддэг шинэ аюултай тулалдах аж.
Киног хэрхэн үзэх вэ?
"Spider-Man: Brand New Day" кино 10 дугаар сарын 6-наас эхлэн Apple TV, Prime Video, Fandango at Home зэрэг платформуудад 29.99 ам.доллароор худалдан авах, 24.99 ам.доллароор түрээслэх сонголттойгоор гарчээ. Киног түрээсэлсэн тохиолдолд 30 хоногийн хугацаатай байх бөгөөд нэгэнт тоглуулж эхэлбэл 48 цагийн дотор үзэж дуусгах шаардлагатай.
Түүнчлэн Sony Pictures болон Netflix хоорондын гэрээний дагуу тус бүтээл цаашид Netflix стриминг платформ дээр цацагдах төлөвтэй байна. Албан ёсны тов хараахан гараагүй ч өмнөх туршлагаас харахад 11 дүгээр сарын сүүл эсвэл 12 дугаар сарын эхээр тус платформд орж магадгүй гэж таамаглаж байна.
