Америкийн их сургуулиудын хөлбөмбөгийн лигт өрсөлддөг Колорадогийн их сургуулийн “Баффалос” баг ээлжит ялагдлаа хүлээлээ. Тэд саяхан Оклахома Стэйт багт 57-24 харьцаатайгаар хүнд ялагдал хүлээснээр дараалсан ялагдлын цувралаа тавд хүргэв. Тоглолтын эхний хагаст Колорадо 24-23 харьцаагаар тэргүүлж байсан ч хоёрдугаар хагаст өрсөлдөгчдөө 34-0 онооны харьцаагаар бүрэн давамгайлуулсан байна.
Энэхүү тоглолтын дараа тус багийн алдарт ахлах дасгалжуулагч Дейон Сандерс хэвлэлийн хурал дээр багийнхаа тоглогчдын хандлага, хүсэл эрмэлзлийг хурцаар шүүмжиллээ. Тэрбээр тоглогчид тоглолтынхоо төлөө цалин хөлс, нөхөн олговор авч байгаа атлаа хангалттай хичээл зүтгэл гаргахгүй байгаа нь багийг дотроос нь нурааж байна гэдгийг онцолсон юм. Сандерс ярихдаа: "Би хуучинсаг үзэлтэй хүн. Энэ байдал заримдаа миний сэтгэлийг үнэхээр зовоож, эмзэглүүлдэг. Би хөлбөмбөгт хайртай. Бид тэдэнд тоглосных нь төлөө мөнгө төлж байгаа шүү дээ. Тэгэхээр яагаад байгаа бүхнээ дайчилж болохгүй гэж?" хэмээн байр сууриа илэрхийлжээ.
Мөн тэрбээр Колорадогийн баг тоглогчдыг NFL-д бэлтгэхэд бус, харин их сургуулийн түвшинд сайн тоглогч болгоход анхаарлаа шилжүүлснийг дурдсан юм. Дараагийн шатанд гарах гэсэн дарамт залуу тоглогчдод хэт хүнд тусаж байж магадгүйг тэрбээр хүлээн зөвшөөрсөн байна.
Одоогоор Колорадо 2-5 гэсэн амжилттай яваа бөгөөд Big 12 бүсдээ 0-4 амжилтаар ганц ч ялалт аваагүй цорын ганц баг болоод байна. Тэд өмнө нь Нортвестернд 41-7, Бэйлорт 23-13, Техас Тект 29-7, Ютад 27-24 харьцаатайгаар тус тус ялагдсан юм. Өнгөрсөн улиралд мөн адил тав дараалсан ялагдлаар улирлыг дуусгаж, 3-9 амжилт үзүүлж байжээ.
Энэхүү тааруу амжилтын улмаас спортын шинжээчид болон сэтгүүлчид Дейон Сандерсыг огцрохыг шаардаж эхэллээ. Тухайлбал, “Denver Sports 104.3”-ын шинжээч Уилл Петерсен олон нийтийн сүлжээнд багийн нөхцөл байдал улам дордсоныг шүүмжилсэн бол тус агентлагийн шинжээч Жэйк Шапиро Сандерсыг дасгалжуулагчийн ажлаа хүлээлгэн өгч, тус сургуулийг орхих цаг нь болсон хэмээн мэдэгджээ.
