Сүүлийн үед АНУ тэргүүтэй улс орнуудад улаанбурхан, хөхүүл ханиад, ротавирус зэрэг урьдчилан сэргийлэх боломжтой халдварт өвчнүүдийн тархалт эрс нэмэгдэж байгааг эмч, мэргэжилтнүүд анхааруулж байна. Эрүүл мэндийн салбарынхны үзэж буйгаар энэхүү сөрөг үзэгдлийн гол шалтгаан нь хүн амын дундах вакцинжуулалтын хамрагдалт буурсантай шууд холбоотой ажээ.
Ковид-19 цар тахлын дараагаар вакцинжуулалтын эсрэг үзэл бодол газар авч, эцэг эхчүүд хүүхдүүдээ товлолын дагуух вакцинд хамруулах нь цөөрсөн нь ийнхүү олон жилийн өмнө хяналтад орсон өвчнүүд эргэн ирэхэд хүргэв. Мэргэжилтнүүд вакцин нь зөвхөн тухайн хувь хүнийг хамгаалаад зогсохгүй, нийгмийн дархлааг тогтоон барьж, өвчний тархалтыг зогсоох хамгийн үр дүнтэй арга гэдгийг онцолж байна.
Хөхүүл ханиад нь нярай хүүхдүүдийн хувьд маш аюултай хүндрэл үүсгэдэг бол улаанбурхан өвчин нь маш хурдан халдварлах чадвартай тул дархлаа султай иргэдэд ноцтой эрсдэл дагуулдаг. Эмч нар эцэг эхчүүдэд хандаж, вакцинжуулалттай холбоотой ташаа мэдээлэлд автахгүй байхыг уриалж, эмнэлгийн мэргэжилтнүүдтэй зөвлөлдөж, шинжлэх ухаанд суурилсан мэдээллийг авахыг зөвлөж байна.
Манай улсын хувьд ч мөн вакцинжуулалтын ач холбогдлыг үл ойшоох хандлага зарим хэсэгт ажиглагддаг. Гэвч халдварт өвчин нь хил хязгааргүй тархдаг тул дэлхий дахинд өрнөж буй энэхүү нөхцөл байдал нь Монголчууд бидэнд ч гэсэн анхаарал болгоомжтой байх дохио юм. Вакцинжуулалт нь эрүүл нийгмийг цогцлоох үндэс суурь бөгөөд хүүхдүүдээ эрсдэлээс хамгаалах нь эцэг эх бүрийн үүрэг гэдгийг эмч нар сануулсаар байна.
