“Romantic Homicide” хитийн эзэн, 21 настай поп дуучин D4vd буюу Дэвид Энтони Бёрк 14 настай Селесте Ривас Эрнандезийн амийг хөнөөсөн хэрэгт буруутгагдаж байна. Прокурорын зүгээс дуучныг талийгаачтай хууль бус бэлгийн харилцаатай байсан бөгөөд охин түүний гэмт хэргийн шинжтэй үйлдлийг илчилж, хөгжмийн карьерт нь сөргөөр нөлөөлнө хэмээн сүрдүүлсний улмаас амийг нь хөнөөсөн гэж үзэж байгаа аж.
Хэрэг явдал 2025 оны дөрөвдүгээр сарын 23-нд, түүний анхны цомог болох “Withered” гарахаас хоёр хоногийн өмнө болсон гэж Лос-Анжелесийн дүүргийн прокурорын газраас мэдэгдлээ. Хэдэн сарын дараа цагдаа нар D4vd-ийн нэр дээр бүртгэлтэй, хураагдсан Тесла автомашинаас охины задарч муудсан, эд эрхтэндээ хуваагдсан цогцсыг олсон байна. Түүний цомог Billboard 200 жагсаалтын 13-т бичигдсэн юм.
Дуучин D4vd бүх ялыг үгүйсгэж, гэм буруугүй гэдгээ мэдэгдээд байна. Түүний өмгөөлөгчид “Дэвид Бёрк нь Селесте Ривас Эрнандезийг хөнөөгөөгүй бөгөөд түүний үхэлд ямар ч хамааралгүй гэдгийг нотлох баримтууд харуулна” хэмээн мэдэгдэж, шүүх хуралд хүчтэй хамгаалалт үзүүлэхээ илэрхийлжээ.
Энэхүү хэргийн улмаас D4vd-ийн карьер огцом уналтад ороод байна. Түүний “Withered” аялан тоглолт цуцлагдаж, цомгийнх нь нэмэлт хувилбар гарахгүй болсон юм. Мөн Darkroom/Interscope Records, Sony Music Publishing болон The·Team зэрэг томоохон агентлагууд түүнтэй хамтран ажиллахаа больж, гэрээгээ цуцалжээ. Billboard сэтгүүл уг хэргийн эргэн тойрон дахь үйл явдлуудыг цаг тухайд нь мэдээлэхээр ажиллаж байна.
