АНУ-ын спортын салбарын нөлөө бүхий медиа салбарын хүн, Barstool-ийн үүсгэн байгуулагч Дэйв Портной Охайо Стэйт их сургуулийн спортын багийг "спортын ертөнцийн хамгийн том уйланхайнууд" хэмээн тодорхойлж, олны анхаарлыг татаад байна.
Энэхүү маргаан Индиана их сургуулийн дасгалжуулагч Курт Сигнетти "Big Ten" медиа өдрийн үеэр хэлсэн үгнээс эхлэлтэй. Сигнетти дунд бүсийн багууд ялалтаа хөдөлмөрөөр олж авдаг бөгөөд гомдоллож, уйлдаггүй гэсэн утгатай байр сууриа илэрхийлсэн нь SEC лигийн багуудад чиглэсэн далд шүүмжлэл байв. Харин энэ үгийг ашиглан Дэйв Портной өөрийн эртний өрсөлдөгч Охайо Стэйт баг руу дайрчээ.
Портной "Wake-Up Barstool" нэвтрүүлгийн үеэр ярихдаа, Охайо Стэйтийнхэн Мичиганы багт хожигдох үедээ ялагдлаа хэзээ ч хүлээн зөвшөөрдөггүй, харин ч эсрэгээрээ байнга гомдоллож, уйлдаг гэж мэдэгдсэн байна. Тэрээр Охайо Стэйтийн багийнхан ялагдсаныхаа дараа ханиад томуу, цаг агаарын нөхцөл байдал эсвэл бусад шалтгаан тоочиж, гомдол гаргадгийг онцолжээ.
Нөгөө талаас, Охайо Стэйтийн дэмжигчид ч зүгээр суусангүй. Тэд Мичиганы багийг өмнө нь гарч байсан "дохио хулгайлах" дуулиантай холбон, тэдний гаргасан амжилтыг эргэлзээтэй хэмээн үздэг байна.
Дэйв Портнойн хувьд энэ нь анхны тохиолдол биш бөгөөд тэрээр өмнө нь Охайо Стэйтийн дасгалжуулагч Райан Дэй-г "аймхай" хэмээн нэрлэж байсан удаатай. Спортын ертөнцөд багуудын хоорондох энэхүү хурц маргаан нь зөвхөн талбай дээрх тоглолтоор хязгаарлагдахгүй, медиа салбарын томоохон төлөөлөгчдийн дунд ч үргэлжилсээр байна.
