Дэлхийн улс төрийн нөхцөл байдал улам бүр ээдрээтэй болж байгаа энэ үед цөмийн зэвсгийн аюул заналхийлэл дахин нэмэгдэж байна. Стокгольмын Олон улсын энх тайвныг судлах хүрээлэнгийн (SIPRI) шинэ тайланд дурдсанаар, дэлхийн томоохон гүрнүүд цөмийн зэвсгийн нөөцөө нэмэгдүүлж, түүнийгээ үндэсний аюулгүй байдлын гол баталгаа хэмээн үзэх болжээ.
Тайланд дурдсанаар, өнөөдөр дэлхий дээрх цөмийн зэвсэгтэй есөн улс орнууд зэвсэглэлээ орчин үеийн болгох, шинэчлэхэд асар их хөрөнгө оруулалт хийж байна. Геополитикийн хурцадмал байдал, ялангуяа Орос-Украины дайн болон Ойрхи Дорнодын мөргөлдөөнүүд нь олон улсын харилцаанд итгэлцлийг үгүй хийж, цөмийн зэвсгийг "хамгаалалтын бамбай" хэмээн харах хандлагыг хүчтэй болгов. Энэ нь хүйтэн дайны үеийн цөмийн зэвсгийн уралдаан эргэн ирж байгааг илтгэж байна.
SIPRI-гийн шинжээчид цөмийн зэвсэгтэй улсууд нөөцөө нэмэгдүүлж байгаа нь дэлхийн энх тайван, тогтвортой байдалд асар их эрсдэл учруулж байгааг онцолжээ. Зэвсэг хураах, хянах чиглэлээр хийгдсэн өмнөх гэрээнүүд хүчин чадлаа алдаж, улс орнуудын хоорондын яриа хэлэлцээ тасалдсан нь нөхцөл байдлыг улам дордуулж байна. Ялангуяа цөмийн зэвсэгтэй гүрнүүдийн хоорондох харилцаа холбоо суларч байгаа нь санамсаргүй байдлаар цөмийн мөргөлдөөн гарах магадлалыг өсгөж байна.
Залуучуудын хувьд энэ мэдээ нь бидний ирээдүйд нүүрлэж буй томоохон сорилт юм. Цөмийн зэвсэг нь зөвхөн улс төрийн хэрэгсэл биш, харин хүн төрөлхтний оршин тогтнолд заналхийлж буй бодит аюул гэдгийг мэргэжилтнүүд сануулсаар байна. Дэлхий дахин энх тайвныг эрхэмлэхээс илүүтэйгээр зэвсэглэлд анхаарлаа хандуулж байгаа нь олон улсын хамтын ажиллагааны ирээдүйг бүрхэг болгож байна.
