АНУ-ын Холбооны мөрдөх товчоо (FBI)-ны захирал асан Жеймс Коми өөрт нь холбогдох холбооны хэргийг хэрэгсэхгүй болгохыг шүүгчээс хүсжээ. Тэрээр өөрийн цахим хуудаст нийтэлсэн далайн хясааны зураг нь АНУ-ын Ерөнхийлөгч Дональд Трамп-ын эсрэг хүчирхийлэл үйлдэхийг уриалсан үйлдэл биш гэж үзэж байна.
Комигийн өмгөөлөгчдийн тайлбарласнаар, Инстаграм хуудаст байршуулсан далайн эрэг дээрх “86 47” гэсэн тоон хэлбэртэй хясааны зураг нь Ерөнхийлөгчийн эсрэг чиглэсэн ямар нэгэн “бодит заналхийлэл” биш юм. Тэд энэхүү нийтлэлийг үндсэн хуулиар хамгаалагдсан улс төрийн үзэл бодлоо илэрхийлэх эрх чөлөөний хүрээнд багтах үйлдэл хэмээн мэтгэлцэж байна.
Жеймс Коми нь тус улсын Ерөнхийлөгч Дональд Трампын шийдвэрээр албан тушаалаасаа чөлөөлөгдсөн нэгэн юм. Одоогоор шүүх хурал үргэлжилж байгаа бөгөөд түүний хуулийн баг засгийн газраас гаргасан буруутгалыг нотлох хангалттай үндэслэл байхгүй гэж үзэж байна.
