Технологийн магнат Илон Маскийн хиймэл оюун ухааны (AI) чиглэлээр ажилладаг xAI компани АНУ-ын Миссисипи мужид байрлах Colossus 2 хэмээх мэдээллийн төвдөө бараг 50 орчим хийн турбиныг хяналтгүй ажиллуулж байгаа нь байгаль орчны асуудал дагуулж болзошгүй нөхцөл байдал үүсгэжээ. Энэ тухай TechCrunch цахим хуудас мэдээлсэн байна.
xAI компанийн эдгээр турбиныг цахилгаан станц шиг ашиглаж байгаа нь тус компанийг шүүхэд өгөх үндэслэл болж магадгүй байгаа аж. Учир нь, эдгээр турбинууд нь хөдөлгөөнт зориулалттай ч, бодит байдал дээр суурин станц шиг ажиллаж байгаа бөгөөд байгаль орчинд үзүүлэх нөлөөллийн хувьд ч маш өндөр байгаа юм байна.
Илон Маск нь “Tesla” цахилгаан автомашины компани, “SpaceX” сансрын технологийн компани зэргээрээ дэлхий дахинд танигдсан билээ. Түүний xAI компани нь хиймэл оюун ухааны чиглэлээр судалгаа хийж, шинэ бүтээгдэхүүн хөгжүүлэх зорилготойгоор байгуулагдсан. Гэвч тус компанийн үйл ажиллагаа байгаль орчны болзошгүй эрсдэл дагуулж байгаа нь олон нийтийн анхаарлыг татаж байна.
Мэдээллийн төвүүд нь асар их хэмжээний цахилгаан эрчим хүч хэрэглэдэг бөгөөд энэ хэрэглээг хангахын тулд дизель болон хийн турбиныг нөөц эх үүсвэр болгон ашиглах нь элбэг. Гэсэн хэдий ч, эдгээр турбиныг хэт их ашиглах нь агаарын бохирдол, хүлэмжийн хийн ялгаруулалтыг нэмэгдүүлж, улмаар байгаль орчинд сөргөөр нөлөөлөх эрсдэлтэй. xAI компанийн хувьд энэ асуудалд хэрхэн хандаж, ямар арга хэмжээ авах нь цаашдын үйл ажиллагаанд нь чухал нөлөө үзүүлэх биз ээ.
