Испанийн улс төрд томоохон дуулиан дэгдэж байна. Тус улсын Ерөнхий сайд Педро Санчесийн гэргий Бегонья Гомесийг авлига болон албан тушаалаа урвуулан ашигласан хэргээр шүүхээр болсныг орон нутгийн шүүхээс бямба гарагт зарлалаа. Шүүгч Хуан Карлос Пейнадогийн гаргасан захирамжаар Бегонья Гомесийг гадаад паспорт хураалгахыг үүрэгдэж, сард хоёр удаа шүүхэд биеэр ирж бүртгүүлэхийг даалгасан байна. Түүнийг хэрэг хянан шийдвэрлэх ажиллагааны хугацаанд эх орноосоо гарахыг хоригложээ.
Бегонья Гомес нь бизнесийн хүрээнийхэнтэй сэжигтэй харилцаа тогтоож, нөлөөгөө ашиглан ашиг хонжоо хайсан гэх хэрэгт холбогдоод байгаа юм. Энэхүү үйл явдал нь Испанийн засгийн газрын тэргүүн Педро Санчесийн хувьд улс төрийн ноцтой сорилт болж байна. Түүний тэргүүлж буй цөөнхийн засгийн газар нь өмнө нь ч өөрийнх нь гэр бүл болон ойрын холбоотнуудыг тойрсон авлигын хэргүүдээс болж тогтворгүй байдалд ороод байсан билээ.
Педро Санчес эхнэрийнхээ эсрэг үүсгэсэн энэхүү хэргийг улс төрийн зорилготой, сөрөг хүчнийхний явуулга хэмээн удаа дараа мэдэгдэж, эхнэрээ гэм буруугүй гэж өмгөөлсөөр ирсэн. Гэвч шүүхийн шийдвэр гарч, хэрэг шүүх хуралдааны шатанд шилжсэн нь түүний Засгийн газрын ирээдүйд ихээхэн дарамт учруулж эхэллээ. Хэрэв шүүхээс гэм буруутай нь тогтоогдвол энэ нь Испанийн социалист засгийн газрын хувьд томоохон цохилт болох юм.
Одоогоор Бегонья Гомес болон түүний өмгөөлөгчид шүүхийн шийдвэртэй холбоотойгоор албан ёсны тайлбар хийгээгүй байна. Испанийн улс төрийн хүрээнийхэн энэ хэрэг хэрхэн өрнөхийг анхааралтай ажиглаж байгаа бөгөөд энэ нь тус улсын сонгуулийн болон засгийн газрын тогтвортой байдалд хэрхэн нөлөөлөх нь тодорхойгүй байна.
